غضبة مناضل

تفوو على الكارة، تفوو على كارة الوسخ، والكائنات المجهرية اللي كتعيش فيها ،اصلا هي مجهرية كون ما كانت كذلك كوراها بانت للدولة شحال من عام هادي ،
ناس الدنيا كتطالب بحقوق اخرى واحنا عادا فقنا ،وكنطالبو عا بالدولة ومخزنها يرضي علينا
طالبين ،ومزاوكين ،ومعورطين ،عا العار لاما جيبوا لينا البوليس يحرسنا ويحضينا ,
وحق الله حتى ذلونا وردونا كلاب بحال كلاب تجربة باقلوف ملي كان يقرع الجرس هما يخرجوا ريوكهم .
اصلا احنا كلاب ولاد كلاب ،كون ما كنا كلاب كاعما اللي سوى واللي ما يسوى يبيع ويشري فينا بحال الحمير تاع التبركيل، يهزو علينا ماعطى الله في الصيف ويدردبونا في الخريف ،ولا يبيعونا للجزارة باش ياكلونا بيضاوة .
العالم المتقدم انتهى من امور التنضيم في قطاع الامن ف القرن 19مع التورة الصناعية ، ولكن احنا ف القرن واحد وعشرون ولينا باغين عا المخزن ومالقيناه ،وااابكري طالبنا بحقنا في الشغل والعيش الكريم والتطبيب .
وعلى هاد الحساب خاصنا نبقاو نطالبوا نطالبوا نطالبوا حتى للقرن 22، وموحالش تكمل، ولا واقيلا نكملوا مطالبنا يوم القيامة ،ونقولوا لله ردنا نعيشوا ونتحاسبوا مع الدولة المغربية راه مازال ما عطاتنا حقنا وما تسامحنا معاهادنيا واخرة .
هانتوما يا موالين الكارة ما غاتشوفوا لا كوميسارية ،لاهم يحزنون ،ماغادا تشيط ليكم تاحاجة لان الدولة طبات الريالات ،وماعندها فلوس باش تزيد لاعدد البوليس ،ولا جدارمية وماعندها حتى باش تخلص الضو تاع الكوميساريات ،وراها عايشا غي بالطلبة وبالكريدي بحال شي قمار كاراوي كيخسر فلوسو في التيرسي ، ورئيس حكومتكم راه نقص من ميزانية الاستتمار اللي اصلا ماكان حتى سنتيم غادي يجيكم منها .ماعدا باش يتخلصوا دوك الموضفين التعساء اللي ف البلدية .
سيروا اللي عندو شي باب يزيد قفل ،واللي عندو شي حانوت يدير ليه جوج بيبان ،ووليوا تدخلوا مع الستة تاع العشية احسن ليكم ،والى عرضتو على شي واحد، غاوتوا عليه يتغدى قبل ما يتعشى بيه شي واحد شمكار ومقرقب .
باغيين الامن ،الامن مالقاتو تا كازا اللي شمكارة تاع الرباط قربلوها واللي الطوبيسات فيها ولاو يتخطفوا ،وزيدون دوك اللي نتوما معولين عليهم يحميوكم راهم ولاو يتقاتلوا بيناتهم على الرشوة .
كحلة عيشتكم ياموالين الكارة، ومكتوب عليكم الفساد الى ابد الدهر ،واخا ماعرت اش تديروا وكي قالوا العرب ملي كانوا رجالة ،استنجد غريق بغريق فغرق الاتنان ,
ايوا بقاو تغاوتو في خواطركم