الرايس هرب ... الرايس هرب

الرايس هرب ، الرايس هرب
هرمنا هرمنا في انتظار هذه اللحظة
وايه راه ماشي رايس تونس بن علي هاذ المرة ، راه رايسنا حنا لي هرب ... و بين الرئيسين نقط التقاء كثيرة : الإثنان يحبان المال حبّا جمّا فياما جمعاه و لمّاه لمّا و لم يرحما في هرفه أبا ولا أمّا ، و الإثنان يحبان الفخفخة و التفطاح كيفا و كمّا حتى صار جنون العظمة عندهما سمّا فتجرعاه حدّ الثمالة و صارا عن الحق صمّا ، و الإثنان نسيا أصلهما و قد تجرّعا في شبابهما ذلّا و همّا و تدردبا هنا هناك وكانت حياتهما فقرا و غمّا إلى أن أنعم عليهما الإلاه و ولّاهما على العباد فضمّهما الشيطان ضمّا ، و الإثنان كانت شوهتهما بجلاجل فالأول نفي و تنكر له الأهل فلا أخا و لا عمّا و الثاني ظلّ يبحث عنها حتى جابها في رأسه لمّا ... هاجم الغاضبون قلعته و أشبعوه سبّا و ذمّا حتى صار كالدجاجة و صار مكتبه الفاخر خمّا ، قد قلّبت عليها فلا تلومن إلا نفسك و لتضرب الطمّا و لا تقولن ظلموك ألم تشمشم على المصائب شمّا ، ياما نصحناك و انتقدناك كي تكفّ لكن ما عبرو عليك غير لي زمّو ليك الفم زمّا و كان درقوشك مشرّعا و كأنك صلاح الدين يؤم الخلق أمّا
كان حديدان قد قرر احتراف الصمت فتقهقر فاقدا الأمل في بني جلدته أما و قد حدث بالأمس شبه انقلاب في بلدته المجروبة فإنه لم يعقل على رأسه حتى ارتمى على حاسوبه محاولا المشاركة في ثورة المشردين هاته و لو بتسليط الضوء عمّا حدث بالفعل وقت هجوم الخلق على قمقم القمقوم ، عساه بحكيه يشحد الهمم و ينهض النيام و يظهر أن الجبار مهما تجبر فإنه يظل مجرد بشر يأكل و يشرب و يرقد و يذهب إلى المرحاض و تشدّه التقفقيفة مثله مثل أيها الناس كلما وجد نفسه في مواجهة الرجال ... فلتعلموا أن الجبابرة إنما يستمدون قوتهم من ضعف المظلومين
يوا تعالاو تسمعو بوذيناتكم لي غادي ياكلهم الصمك و تشوفو بعويناتكم لي غادي يصدّيهم العمى
هاذ الناس لي بناو بلا قانون فين صيبوا وريقاتهم ؟ ماشي في البلديات ديال الدولة ؟ وهاذ الباشاوات لي كانو و هاذ المقدميين و الشيوخ و التقنيين لي كيتخلصو من فلوس الشعب فين كانو ملي كان البني ؟ و السي المنتخب ديال الدائرة كان في العمرة على طول ؟ و خو الرايس لي باني ماشي غير بلا رخص و لكن مترامي على أرض الدولة ، ما يتطبقش عليه هاذ القانون ؟ و السي العضو المحترم ولد الولدية لي قام بعدة إصلاحات بلا رخصة ، ما يتحاسبش ؟ و حبيبنا و صحيبنا زاكورة لي غير كيبزق في البرطمات بلا حتى و ثيقة و كيخرمز في البقع المشبوهة ماشي خصو يتشد ؟ و أكثر من هذا و ذاك دار الوالدين لي كيجي ليها السي الرايس عندها شي ورقة ، عندها شي رخصة ؟ ياك تبنات غير حسي مسي في دريبة المقراطي أو لا لا ؟؟ نعام أسّي ناس دوار بلال مخالفين للقانون إيه على راسنا و عينينا و لكن أشنو الفرق بينهم و بين هاذو لي ذكرت ؟ ياك كلهم مواطنين ، و زيدون راهم عاطيين لفلوس لمسؤولين دارو عين شافت و عين ما قشعت و ضربوها بتمييكة ، و هاذو خصهم المسائلة و الحساب و العقاب أو لا القانون غير على الضعفاء ؟
ما علينا لي عطى الله عطاه و لي بنى جا على عين قفاه ، أراو لينا آش طرا البارح ؟ غادي نعاودها ليكم بحال الخبيرة و بالدارجة الفصحى :
الناس لي رابو ليهم الديور و لي مهددين تاهوما بالترياب هبطو لعند الرئيس ديريكت علاش في نظركم ؟ ياك ماشي الرايس لي ريب ليهم و ماشي صلحان ؟ و ماشي المجلس ... هبطو عندهم حيث هوما لي عاطينهم الضو الخضر باش يبنيو كاين فيها لي تفاهم معاهم باش يصوتو عليه و كاين لي خاذ ثمن التمييكة ديالو
الرايس ملي هجمت عليه الجموع كلشي صحابو و أعضاء أغلبيتو خواو بيه و كلشي سلت لقى غير صحاب البلدية هوما لي عتقوه : الناس يدفعو في باب المكتب ديالو من برا و هو يدفع من الداخل معاونينو عمال النظافة (كون غير شطبوه هو نيت ذيك الساعة) شوية تشجع خرج عندهم باش يخلعهم زعما لعل و عسى ، ملي تلاحو في وجهو ما لقى باش يجاوبهم حاول يبرد و ملي شاف العين حمرة قرر يهرب بحال ولد عمو بن علي ، قصد طوموبيلتو وقفو ليه قدامها و دارو بيه المكشكشين و بداو كيخبطو ليه في المشقوفة (ما بقيت عارف واش عندو خنزيرة و لا كات كات و لا حلوفة) ، واحد السيدة كتقول ليه : "نتا لي قلتي لينا بنيو ، نتا شفار و منافق و ماشي راجل" .... كرنخ "لوبرا دروا" ديال خوه وصعيصعة زمانه جا يحل فمو ناضو ليه حتى هرّبوه غير شي وحدين ... صلحان مسيكين يعطيه سكين كيغوث حتى هو دار فيها بطل حيث عارفها منها لظهرو و هو لي غارق في هاذ الضوسي الخانز ، كيقول ليهم : "أنا معاكم انا نموت معاكم" هاي هاي هاي على المناضل يوا بعدا غير عيش معاهم و عاني بحالهم عاد أجي موت معاهم ، هو يقول هكذاك و هوما كيقولو ليه :" ها الانتخابات جاية عنداك تدور بساحتنا ، دور بينا و تشوف مع راسك " ، شوية دار فيها فاهيم و قاليهم راه ماشي حنا (ولاو بحال الدري ملي كتحصليه و كيبدا يحلف ليك و الله مانا ههههه) و رسلهم لعند الباشا ... الباشا نفعوه غير المخازنية يدفعو في الباب و ملي دوى معاهم ولا يقول ليهم : "تسناوني غير يجيني تيليفون و نجاوبكم الله يرحم ليكم الوالدين ، يلا كنتو مذاكرة حرارغير صبرو عليا" وقال ليهم :"انا يا الله جيت ، واناري على نهار كيداير يا مولانا راه ماشي أنا راها كاينة لجنة متبعة هاذ الملف و هي مولات الأوامر" وخبرهم بلي مازال غادي يكون الترياب ، قالو ليه : "يلا عاود جيتو بوطات هوما غادات يتفرقعو و غادة تطيح بعض رواح قدام التراكسات" و جبدو ليه وراق مصايبين في بلدية الكارة و هو يسولهم شكون لي رسلهم لعندو ، قالو ليه صلحان هو يتلافت لصلحان و قال ليه : "أسيدي كتعرفني أنا لي صيفطتي ليا هاذ الناس ؟ خرج عليا اسيدي ، مكنعرف تاواحد أنا" ... زاكورة لي موالف هو الأول في الجمع و صوتو يجعوق فوق الأصوات و يضل محيح على صحاب لكرارس مبعد لهيه و كيشوف غير من بعيد ، و يقدر يقرب و المشهد كان مرعب : جموع غفيرة ، كلشي كيغوث ، شي يبكي و شي يندب و شي سخفان و شي كشاكشو خارجة و العينين عميين ... الجدارمية كيتفرجو من بعيد و ما قادرينش يتدخلو.... من بعد جاتنا خبار أن الرايس و صلحان مشاو حدا الليسي و بقاو مخبيين تما و وجوههم عليهاغبرة ترهقها قترةأولئك هم الكفرة الفجرة (نحسبهم كذلك و الله و الذين يصوتون لهم أعلم) .... المهم يلا كانو غادين للجحيم ملي يموتو هاهوما شافو شانتيوو من الجحيم لبارح

الحاصول وما فيه كيما الرايس هرب لبارح غدا أو بعدو تقدرو تهربوه هو و رباعتو خصكم غير تبغيو