الهضرة يا الرايس ما تعمر القفة

لا حول ولا قوة إلا بالله العلي العظيم. هناك مثل يقول: كيحاجي وكيفكّ غير بوحدو، وهو دلالة على حالة شي واحد داوي غير بوحدو، وما باغي يسمع حد. إنه حال الرايس ديالنا في العديد من اللقاءات التواصلية لي نفخ لينا بيها ريوسنا و هو ملي كيشد فيها الكلمة ما كيطلقها يصحب راسو كيترافع في المحكمة ، أشمن تواصل هذا واقيلا باغي يتواصل مع راسو .
بطبيعة الحال كل من يسأل ويجيب نفسه لا يطرح إلا الأسئلة السهلة باش ما يحصلش، وباش يكون الجواب ساهل بحال شريب الما، وهو ضرب من الغميق وضميص الكارطة وقول كلشي باش ما تقول والو. وانا كنظن ان السي الرايس كيصاوب الأجوبة عاد كيطرح السؤال و مع هو حفاظ و معروف كياكل الكاغط فإنه كيحفظ و كيجي في اللقاءات و الاجتماعات غير يتقيى داك الشي لي حفظو.
وأكاد أجزم أن هاذ الرايس (ناري شحال زوينة هاد أكاد أجزم وااااو)، من خلال دعوته لفعاليات المجتمع المدني أو فعاليات المجتمع كلشي هاني ، سار على نهج " ناخذ الكلمة و منطلقهاش " باش ما يخلي للفعاليات التي لا تفعل شيئا ما تقول ، فقرر أن يجيب و يجيب و يبقى يجيب على أسئلة لا جواب لها في الحقيقة ويعطي لعباد الله ما يهضرو في القهاوي من الشكاوي حتى للكلام الخاوي ، باش يقولو الله على رايس شحال مجهد و قاري و مثقف . والواعرة هي ملي كيجينا من فوق هاد الشي كامل وتيقول حقّا ما حقّا راه هاد الشي ماشي مضمون يعني ما عليهش لاسيرونس حيث ما لقيتش معامن نخدم و كلشي خوا بيا. ولواه، وبقا شاد فكلامك و وعودك لي عميتي بيها الناس.
في رواية أخرى، يا معشر الناس، راه ما كيهضر بوحدو غير اللي طاير ليه الفريّخ، مع أن ولاد الكارة أحوج إلى أجوبة واقعية وليس إلى كلام على المنابر فخطب الرئيس كلها كلام من نوع سير ضّيم، والكلام الرئاسي عندنا أسوأ من الكلام على العواهن، وأسوأ حتى من لغة الخشب والحطب والحجر ودردك زيد دردك.
دابا اللي بغا يدير المعارضة مع هاد الرايس خاصو يبات يحفظ باش حتى هو يتقيى لي حفظو .
الواقع أنه ماشي الرايس اللي طاير ليه الفريّخ، وإنما حنا اللي طيّراتو لينا الأحزاب ، بالمفهومين، يعني حمقاتنا، وفنفس الوقت قلقاتنا، الله يخرج سربيسها معانا على خير هاذ المرة ، وسربيس الكارة معاها، على خير.
يا معشر الناس، لنفرض جدلا أن المجالس نتاعنا دارت اللي عليها، وكثر من اللي عليها، وعيشتنا في النعيم على مدى أربع أو خمس سنوات، هل الحصيلة تقدم بهذا الشكل؟ راه قالو ناس زمان شكار العروسة عاد داز من هنا، وبصيغة أخرى ما يشكر العروسة غير مها وخالتها والحزارة جارتها.
فلتقل أحزابنا و مجالسنا ما شاءت، ماشي هادا هو المشكل، المشكل هو أننا نقتل المصداقية بمثل هذه الطريقة. ها البرلمان جاي سيرو قولو عندو ما بغيتو و قولو لديولكم يخطبو فيه علينا شوية .ويلا بغيتو توريونا أشنو درتو ها السوق و شطيبة ديرو بوك و تحدثوا عن المنجزات ديالكم ، وتحدثوا عن التضحيات باش يسمعكم الجميع و غير بالدارجة الله يرضي عليكم ، ولكن بقليل من الموضوعية، يعني قولو لينا شنو درتو، وقولو لينا شنو ما درتوش، وقولو لينا علاش، حيتاش علاش هي المهمة فهاد الفيلم كامل..
داخلنا عليكم بالله واش دابا الناس ديال قرية بحال أالكارة غادي نقولو ليهم سيرو حضرو للقاءات الرايس باش تعرفو الحمامة شنو دارت ليكم؟ هاد النوع من المواطنين واخا تبقاو تعاودو ليهم النهار وما طال لن يصدقو شيئا إلا يلا شافو بعينيهم و هوما لحد الساعة ما شافو حتى حاجة ، وعندهم الحق ميثيقوش ، لأن واحد ما عندوش حتى التحضيري وكتقولو ليه سير حضر و فهم لغة الرايس الفصحى لي كلها ألغاز و مراوغات ، باش تعرف شنو دار ليك المجلس وهادي ديال المعلمين عندكم.
وراكم وليتو مجالس هضراتية نيييييييت.

داخلنا عليكم بالله واش كتفهمو آش كيقول ليكم سليعفان؟

محاااااااااال.

يوا تبقاو على خير.

راحت عليه ما تبقاش مصدع راسك بيه ، صافي مشى فحالاتو باي باي الفقيهي.