تقرير المجلس الأعلى للحسابات (الكارة) - خاتمة حديدان

و مادام رايس القبيلة بالتقرير ما رضاش و الجواب عليه ما بغاش أو ما لقاش باش و فضل يبقى لاعب مع المحاكم قاش قاش ، غادين نوبو عليه باش لالة مولاتي اللجنة تبقى على خاطرها و متديرهاش منا قلة الصواب راه غير جاتو في واحد الفترة كان مريض فيها و كانت غادة تسكت ليه المڭــانة.
إذن :

بالنسبة للتنمية لا أقول بأن نسبة تنفيذ مخططها كما قال التقرير كانت % 27 بل أقول أنها كانت صفرا أصفرا كوجوه النفاق التي ابتلينا بها في تسيير شؤوننا بمدينة الكارة . أين هي علامات هذه التنمية و الكارة غادة لاور لاور ؟ خليونا بلا ما نبداو في المعيار راه كذوبكم و نفاقكم و نهبكم يا لخيار هوما لي خلاونا غاديين مارشاريار أشمن اشتراكية هذه أم هي اشتراكية شهريار كيقصر كل ليلة على وحدة و في الصباح يضرب عنقها بمنشار ؟
و يتحدث التقرير في هذا الإطار عن مجموعة من المشاريع ذات الأهمية القصوى للمدينة و التي لم يتم إنجازها ؟؟؟ كما لو كان أفراد لجان التفتيش يظنون أنهم يخاطبون بشرا هؤلاء لا برامج لا سياسيات لا تخطيط ما كاين غير الماكلة و الصريط ولا فرق بين كوريط و كوريط فما بالك بلغة الأرقام التي أوتي على ذكرها و عندنا قوم لا يفهمون من الأرقام إلا ما يمكن أن يحشروه في جيوبهم
و قال ليك توصيات راه كيقول المثل "لا توصي يتيمة على بكا" ، هاذ الرهوط لي عندنا عارفين أش كيديرو واش باغيين و ليسوا في حاجة إلى توصيات بقدر ما هم في حاجة إلى حوالا و حوليات يعيدون انتخابهم و بالطبالة و الغياطة و العونيات.
ختاما و ردا على استفسارات اللجنة بشأن التنمية نقول أن ما يهم هؤلاء هي تنمية أرصدتهم و أن الجميع يستطيع التخمين حول مآل المبالغ التي كانت مرصودة لتحقيق هذه التنمية.

و فيما يتعلق بالصفقات المشبوهة و التي فصلها التقرير تفصيلا بعد أن خيطها أصحابها جيلا ، فحدث و لا حرج و دردش ولا فرج و ما دخل عبرها ما خرج ، فهذه الصفقات ليست سوى وسيلة لنهب المال العام و لا يرجى منها خيرا للكارة بسكانها و الدليل أرقام التقرير.
تحدث التقرير عن أشغال تم تنفيذها ولم تكن واردة في دفتر الشروط ، وامالين التقرير هذا راه جلالة مكرم الأول سلطان مدينة علامن تعول هذا راه شهريار زمانه و ما أتيتم على ذكره شيئ يسير بالمقارنة مع كل ما وقع و غير بينا و بينكم السيد تزوج بشابة و ضبر ليها على بقعة من عند العراقي لي قال ليك حتى هو رجل قانون و متنساوش قضية هاذ البقيعة و لي ماشي هي الأولى و لا اللاخرة و ملي غادي يوصل التقرير للتجزئات السكنية غادين تعرفو أن هاذ البقيعة و أخواتها هن ثمن سكوت الرايس على استخلاص الضرائب كاملة من أصحاب التجزئات و الإمضاء على التسليم النهائي لها رغم افتقارها لأبسط شروط التجزيء...قلنا السيد تزوج المرا و ضبر ليها على أرضية و بناها ليها على ظهر الجماعة إيوا كيفاش بغيتوه يسلك عندها يلا ما صايبش ليها الطريق و وصل ليها الشانطي حتى لفم الدار ؟ واش بغيتو السيد يمشي يشرى بوط من فلوس الميزانية باش يسلك عند الزوجة الثانية و لي توظفت و كتخلص من فلوسنا بنت الروحانية ؟
هل فهمت الآن يا لجنة مغزى الأشغال التي نفذت و لم تكن في الحسبان و ما هذا إلا مثال فكم من زنقة عبّدت و كم من دريبة بلّطت و كم من ميزانية صفّيت لا لشيئ إلا لإسكات هذا العضو أو ذاك من بعض الأعضاء المسعورين و الذين كانوا يستفيدون هكذا من حملات انتخابية مجانية على حساب الشعب فيقولون لبطل التقرير : أسيدي كول بصحتك صايب ليا غير زنقتي باش نعاود ننجح ... و نسوا أننا استأمناهم على أموالنا و مصائرنا و ممتلكاتنا.
فكيف بالله عليك يا لجنة تريدين أن تتطابق كشوفهم التفصيلية مع جداول منجزاتهم أو بالأحرى جداول ضربهم للميزانية لأن أكثرهم لم يتعلم من جداول الضرب إلا دعاوي البلا : فالقسمة عندهم هي قسمة الغنيمة فيما بينهم والجمع في عرفهم هو جمع المال ، اشمن زائد راه الزيادة من راس الحمق أو هي الزيادة في التشلهيب و النهب والطرح بالنسبة إليهم ،ڭــاليك ناقص و هم ناقصين أصلا ، هي طرحة ديال العمود لمن خالفهم أما الضرب فهم توقفوا عند معنى الكلمة الأدبي و ليس الرياضي فما كاين غير ضرب : هذا كيضرب الميزانية ولاخر كيضرب جيوب المواطنين و بزيزوار نيت و الثالث كيضربها بزفطة و الرابع كيضربها بسلتة بل هنالك من ظن أن كل أشكال الضرب باتت مباحة فأصبح يضرب الناس و يضرب الموظفين ضربا ضربا الله ينزل عليهم اللعنة صبا صبا.
أما عن احترام مبدأ المنافسة و القانون واضح في هذه المسألة فإن المنافسة في أعراف مسؤولينا هي التنافس على الاغتناء و على الظهور و التباهي بالسيارات أو البنات أو الزردات أو القصارات.

وصلنا للبونات و البونات يا البونات شحال من واحد غنات و شحال من واحد برعات من الرؤساء و الأعضاء و موالين الشركات هاذ الفقرة غادين نتوسعو فيها مزيان حيث فيها العجب المتعجب و غادين ندرّجو باش كلشي يفهم :

- الكتوبا ولاو يتشراو من الميزانية باش ولادهم يقراو على حسابنا ، أسيدي ما كاين باس غير يقراو لينا و يوصلو عوض ما يخرجو لينا شمكارة يحيحو علينا في الحملات الانتخابية ولكن باش يوليو يعيّدو من فلوس الشعب و بخمسالاف درهم وكاين لي مالاقيش باش يعيّد فهذا عيب و هذا عار و لحوالا في خطار لفلوس داهم العضو و لبطانة داها الڭــزار ، شوي مع راسك و كول ليك بولفاف و شري لكتاب و الدفتر و حتى لغلاف من فلوس الشمايت لي طامعين غير في ربعالاف و خايفين لا تجمعهم لاراف يلا هوما دواو على حقهم أو هزو لكتاف.
و مكرم مسكين كيقول راه ما دار لا بيديه لا برجليه و أن بوزيانات هوما لي غرقوه و شي وحدين اتحاديين كانو معاه ، نفرضو أن داك الشي صحيح واش كانو كيقولو ليه :
أجي خويا مكرم نشربو شي قهيوة ولا شي عصير على ظهر هاذ الشمايت و كلشي من عينداهم و جيب معاك شي عشرة التعبئات أسي مكرم باش نعيطو للكرصون ما فينا ما نوضو عندو حتى لكونطوار و تاصل بمول الديطاي معاك يجيب لينا ما نكميو على غدايد المعارضة واش بغاونا نخدمو بلا ما نعتقو الروح و الدماغ و الكرش.
مسكين و مع هو كيحشم ماكانش كيرد ليهم طلباتهم ، و كانو ولاد لحرام كيقولو ليه و هو ما عارفش :
ملي تجيب لينا ذاك الشي شوف معاك الباشا راه غير كينڭــر و
ڭــاليك الدار ما عاجباهش و الطوموبيلا خاسرة صايب ليه عافاك باش يهنينا ياك غير من فلوس الشمايت و كلشي راه فايت و نبقاو أسيدي مزيانين مع السلطة باش تخرجنا من كل ورطة و تقول الشفرة غير زفطة واش أصحبي مخليه موقف لينا الطوموبيلا فوق الطروطوار باش نعيقو نصيبوها و نتا كتدوز عليها صباح و عشية و تسمط عليها و تدخل مجانبة بغيتيه حتى يسد علينا الباشوية و يبقاو مصالح المواطنين معطلين ، راه ما بقى ليه غير عشرين سنتيمتر و يطلعها فوق الدرجات يوا جمع راسك مع المخزن و باراكا ما تخزن ولا السلطة غادة تجبّد ليك لوذن.
و كان مكرام مسكين مع كانو دايرين بيه غير البلطجية ديال الاتحاد ما كيلقى بد من الاستجابة.و مرة مرة كيذكروه بالشلاهبية لي خدامين معاهم :
ما تنساش تدور مع الأعضاء ديالنا و الموظفين لي خدامين لينا ياك ماشي من جيبك غير من الميزانية يا راس الجبانية ياك سميتك مكرم و هي مشتقة من كلمة الكرم يوا كون كريم مع الناس نتاعنا.
مكرم واقيلا كان غير ضحية ، وتانوضاه من التبوحيط ، نتا شبعتي سريط و باغي توحلها في كوريط.

أما قضية الشركة الوهمية قضييييية ما عندها لا مقر لا أرضية غير شفر وارا ليا و هريرو دار كرش و حنيڭـيرة و كويت كات و ولى حتى هو من أعيان المدينة نعاماسيدي و ولات عندو كلمة حتى هو ، ولكن ماكاين باس راه ولد الدائرة نتاعك و كيجري معاك في الحملات و زيدون اللاهم في ولد لبلاد ولا تديها شركة أخرى غادة غادة و همزة همزة في المقربين أولى أو لا لا؟

قاليك أسيدي صايبو لينا الضو و الجرادي و غرسو لينا الشجر راهم طلاوه لينا خضر و وكلو بونا و حنا نشوفو البعر و قالو لي معجبو حال يشرب البحر و لكن سرّنا ياك حنا لي حدرنا ليهم الظهر و حفرنا بيدينا للكارة القبر ، الناس لي خدمو في هاذ الشي قالو للجنة داك الشي لي في البونات مكانش كيجينا سلعة يعني داك شي محسوب على الميزانية كأنه تشرى و العمال ما شافوهش حتى بعويناتهم ... و نصف المغروسات خسر ما عرفنا شراوها بلاش حيث خامجة أصلا و كانت غادة تلاح و لا خلاوها خسرات باش يشريو وحدات خرين و يضربو منهم ضربتهم ثاني ؟
عاد خلي جمل تاميكانيسيانيت راقد ها البنوات ها البياس و لكن مغار مسكين ما شاف لا بياس لا بنوات و هوما عياوه : غير ديباني يا صحبي و شوف اش تدير راه الميزانية ضعيفة و معندناش باش نشريو لبياس ... هوما راهم عايشين كلاس من فلوس البنوات و لبياس و دارو منها بوكو لاباس و قاليك كيبيعو حتىلحديد و النحاس...الله أعلم هنيونا من الباطل.
الحاصول و ما فيه الرايس صعيب و الكارة زغبية : نفقات صورية بالجملة و فواتير عامرة مقادة ولكنها هواء غير البرد ، برق ما تقشع و دفع ما فيهم نفع و أرى يلا كاين ما تدفع و زيد دردك سير برك أرى برّع ...أوه حتى من وراق المكاتب طمعو فيها واش كانو يستعملوها في الطواليط واش كيتغداو و يتعشاو بالكاغيط واش كيفرشوها للمزاليط ؟

دار الكرم و الجود ، اللهم بارك ، مجلسنا القديم كلشي كان كيقول عليه الله يعمرها دار كيعونو المحتاج و يشريو ليه من السكر حتى للدجاج و ربي معاهم جاب الفاراج ... يا بني غفلون نعم عطاكم مكرم و لكن راه كان يعطيكم من فلوس لحرام ماشي من جيبو كيعطيك باكية أتاي بقد وقد و كيحسبها بقد و قد مضروبة في جوج أي يلا عطاك باكية كياخذ ثمن بكية هذي هي كول و وكل و علاه بغيتي نتا تشرب الشاي لمنعنع و مبغيتيهش هو يتبرع راه كبير الكرش ليه تفرقع.

مكرم مسكين منساش حتى الموتى وكان كيتبرع عليهم: 51 واحد ماتو و مسكين ما نساهومش من الإعانات و حقهم من تاي و السكر و الزيت كيوصلهم حتى لقبر ، حتى أن الموتى لي ماشي من الكارة غارو منهم و دارو اعتصام و فيهم لي دار لعزراين موتة حمار ، مكرم خلق الفوضى عند أموات المسلمين و غير المسلمين حيث حتى النصارى ناضو كيتشكاو كيفاش الموتى ديال الكارة واكلين شاربين و فابور من فلوس الشعب و حنا لي بلاداتنا غنية ما كيوصلنا حتى قويلب ديال السكر ... تبارك الله الموتى ديالنا معروفين تما كتلقاهم بخير و على خير و غلاض حتى ضياقو عليهم القبورة ديالهم و باقين بلحمهم و شحمهم ماشي بحال الآخرين غير لعظام و هاد الشي بفضل السي مكرام لي دار لي ماداروش لحمام و قيلا ناوي يترشح ملي يموت و كيسبق للموتى كيفما سبق للأحياء قبل ما يترشح.
و حتى في الدفين كان كيتهلى فيهم الله يخلف عليه ، عفوا الله يخلف علينا راه من فلوسنا ، و واقيلا كان كيضوبل ليهم الكفن عشرة المرات ... تقريبا 9 كيلومتر ديال الثوب ديال الكفونة لي حسب علينا في ربع سنين مع العلم أن عدد الموتى في هذه الفترة كان 316 ميت و أكثريتهم عائلاتهم لي كيشريو ليهم الكفونة و لنفرض أن الجماعة لي شراتهم كلهم ، واش معقول كل ميت جاتو سبعة وعشرين ميترو و نص في الكفن لي تكفن بيه ، ڭــيطون هذا ولا كفن ؟ و نزيدكم حاسب ليه 780 ريال للميترو و هو في الأصل كيدير قل من عشرة دراهم للميترو أي أنه مضوبل الكفن عشرة مرات و مضوبل ليه ثمنو ربعة المرات الخير تبارك الله ، كاين شي رايس في العالم بكل هاذ الكرم : 18 مليون و نص في ربع سنين غير ثوب ديال الكفونة.
و باش نخليو علينا الاموات في التيقار و منقجروش عليهم كيف دار هاذ السيد نختمو بقضية البانووات ديال السيمة لي كيغطيو بيها القبر ، أنا موالف كنشوف الناس كيديرو حجرات عراضات و كيسدو بيها القبورا و لكن السي مكرم مرضاش و قال : خص الموتى ديال الكارة يتبرعو ويلا متبرعوش بالحياة يتبرعو في الممات... و بدا كيفرض يغطيوهم بألواح من الإسمنت لي تقول نجلج بيها داري و لكن المشكلة أنه كيقول أنه كيشريها و كيحسبها على الميزانية و لكن في الحقيقة هي كتصايب في الجماعة من سيمة و رملة و حديد الجماعة و هي مواد فايتة مخلصة ... المسامحة يا موتانا ولكن كون كنتو رجالة ما ياكلوكومش بالحياة و ياكلوكم بعد الممات.

و حلف مكرم حتى يكون أكرم الرؤساء لي دازو عندنا و بدا كيبرع ليا في الخلق و لكن ماشي كل الخلق . موالين بكية تاي مرة مرة و قالب سكر و قرعة زيت ماشي هوما الخلق هذوك راهم البق ، أما مواليا المتبرعين من أصحاب الزرود من المقربين فكانو كيضربو غير الشوا و الكفتة و الصوصيط و داك شي على ظهرنا و محسوب علينا مضوبل اللحم 2160 ريال للكيلو الكفتة 2760 ريال و الصوصيط 3240 ريال للكيلو أثمنة ماكانتش حتى في أيام الجفاف و المجاعة و لكن الله ينعل الجزارة لي كيدخلو معاهم في هاذ التبزنيز و الهموز . و لكن الطيور على أشكالها تقع كيفما كيقول المثل ف هذو ڭــزارة و هذو ڭــزارة ، علاش تفاهمو.

أما مواليك لبراوط دارو قرون و ولات البرويطة مبرعة ها لي كتصايب ليها الرويضة ب5000 ريال ها لي مقدتهاش 5000 و كتصايب ليها الرويضة ب7200 ريال و هي أثمنة تشري برويطة بعشرة الروايض ماشي غير رويضة و زيدون الجماعة عندها 22 برويطة و هوما صايبو 87 برويطة ياكوما دارو على البراوط ديال الكارة و ما جاورها كلهم و صيبوهم خوفا على الشانطيات لا يتكرفسو .
أما واحد جوج روبينيات لي تشراو و تصايبو بمليون و ثمانين ألف فقصتهم قصة لكنها ستصيبني و إياكم بالفقصة و لا داعي لذكر البلومبي و ما رآه من عجائب الرئيس و عصابته.
و واحد كثر من خمسة المليون لي تصرفات على المعلوميات ما لقاو اثر ليها واقيلا مفهموش أن المعلوميات عند هذو خيناتنا هي المعلومة و المعلومة أي الڭــرمومة و جمعها لمعلومات ماشي المعلوميات.
و واحد 13 مليون سيمة و ما جاتش السيما واقيلا السيما مع غبرة كيطيرها البرد فيساع و ما كيبقى ليها أثر لا في السما و لا في الأرض ، كيبقى غير في الفاكتورات و البونات.
و واحد كثر من ثمنية مليون لي تصرفات قاليك على الحديد و القوادس و مالقاو ليها حتى هي أثر ياكوما العمال مع حر الفقر و الجوع ولاو كياكلو الحديد و كيضربوها بنكرة و قالو: ما عمر لا حديد لا قوادس جاو ولا شفناهم.

و بخصوص المداخيل وجد أصحاب التقرير أن كثر من مائة و ستين مليون ديال الضرائب الجماعية كان مسكوت عنها و ليس غريبا أن يكون على رأس هذه الضرائب الضريبة على الأراضي الحضرية غير المبنية التي لم يستخلص منها سوى سبعة في المائة في حين ضربوها بتمييكة على الباقي و تفسيرنا على قد الحال و هو أن هذه الأرقام ليست غريبة إذا علمنا أن عائلة بوزيانات الاتحادية هي التي تمتلك أكبر نسبة من الأراضي الغير مبنية و الخرابات في مدينة الكارة و الفاهم يفهم و غير يلا مبغاش يفهم.

أما لالاتك التجزئات فحدث و لا حرج كيجي مول التجزئة مسيكين و كيقول ليهم أنا خسرت غير قد و قد عل تجزئتي و مع هوما نية بزاف و ظريفين كيثيقوه و كيخرجو ليه ضريبة صغيورة على قدو مسيكين حيث معندوش في حين كان عليهم ان يقوموا بجرد للتكاليف الحقيقية التي تطلبها إنجاز الأشغال و يؤدي صاحب التجزئة ضريبته على ضوء هذا الجرد. و لكن يلا تفهم السبب بطل العجب فمنساوش البقيعة لي جبدناها قبيلا ولي بنى عليها مكرم لزوجته الثانية منزلا و منساوش البقيعة لي خاذ الباشا القديم و البقيعة لي لهفها رئيس المصلحة التقنية و هوما في الحقيقة بقيعات و ماصووات دازو تحت الطابلة و الدليل أن أصحاب التجزئات كانوا يحصلون على محاضر تسلم نهائية للأشغال و على شهادات المطابقة واخا التجزئات ديالهم غير كاملة الأشغال.

أما الضرائب على الملك العام و الخاص للجماعة فمصيبة و الآن فهمت علاش صحاب لبلوك كيموتو على مكرم و السبب أنه لم يكن يستخلص منهم واجبات شغل الملك العمومي و أراضي الجماعة لا بالنسبة للبناء و لا بالنسبة للصناعة و التجارة و المساكين كانوا يظنون أنه مداير فيهم خير إلا أنه بذلك يدفع ثمن الأصوات بطريقة غير مباشرة مادام هذا النوع من الضرائب غير مباشر أيضا
هذا دون الحديث عن عدم استخلاص واجبات كراء الأملاك الجماعية مثل المارشي و غيره مما يحرم الكارة من مداخيل إضافية كان من الممكن صرفها في مشاريع تخدم الصالح العام .

أودي ما كملت هاذ التقرير حتى غفر ليا الله ، أو أتمنى ذلك ، و أنا أفعل ما أفعل لدفع المفاسد و جلب المصالح للعباد.
و أختم هذه المرة ليس بمثال شعبي كما دأبت على ذلك و لكن بسورة قرآنية فنحن في جنازة و لا مجال للضحك ... جنازة الكارة.

يقول الله في محكم تنزيله عن مكرم و أمثاله :

وَمِنَ النَّاسِ مَن يَقُولُ آمَنَّا بِاللّهِ وَبِالْيَوْمِ الآخِرِ وَمَا هُم بِمُؤْمِنِينَ
يُخَادِعُونَ اللّهَ وَالَّذِينَ آمَنُوا وَمَا يَخْدَعُونَ إِلاَّ أَنفُسَهُم وَمَا يَشْعُرُونَ
فِي قُلُوبِهِم مَّرَضٌ فَزَادَهُمُ اللّهُ مَرَضاً وَلَهُم عَذَابٌ أَلِيمٌ بِمَا كَانُوا يَكْذِبُونَ
وَإِذَا قِيلَ لَهُمْ لاَ تُفْسِدُواْ فِي الأَرْضِ قَالُواْ إِنَّمَا نَحْنُ مُصْلِحُونَ
أَلا إِنَّهُمْ هُمُ الْمُفْسِدُونَ وَلَـكِن لاَّ يَشْعُرُونَ
وَإِذَا قِيلَ لَهُمْ آمِنُواْ كَمَا آمَنَ النَّاسُ قَالُواْ أَنُؤْمِنُ كَمَا آمَنَ السُّفَهَاء أَلا إِنَّهُمْ هُمُ السُّفَهَاء وَلَـكِن لاَّ يَعْلَمُونَ
وَإِذَا لَقُواْ الَّذِينَ آمَنُواْ قَالُواْ آمَنَّا وَإِذَا خَلَوْاْ إِلَى شَيَاطِينِهِمْ قَالُواْ إِنَّا مَعَكْمْ إِنَّمَا نَحْنُ مُسْتَهْزِئُونَ
اللّهُ يَسْتَهْزِئُ بِهِمْ وَيَمُدُّهُمْ فِي طُغْيَانِهِمْ يَعْمَهُونَ
أُوْلَـئِكَ الَّذِينَ اشْتَرُوُاْ الضَّلاَلَةَ بِالْهُدَى فَمَا رَبِحَت تِّجَارَتُهُمْ وَمَا كَانُواْ مُهْتَدِينَ

dkhelt lhad elmontada bach n3ref o nt3arf 3la akhbar medina kanbghiha b3id 3la essyassa o alhazazte achkssiya mais l9it had hdidane ma3ndo chghol ghir moukam o bayen men enass eli moukram m3a9dhom!!!!!!! Monsiuer hdidane kan min aljdar bik tkhali elmontada li neass dyal elgara kamline mohibine o monadiline o ghayourine machi ghir alha9idine bhalek kan khassek tkhali elmontad kalimat kol ennas bla matfred 3lina araaek hit kolchi kbir o fahem 3lach mokram alwahid eli jato lajna plutot 2 diyal elejnat hada dalil bi anou a3daao fi essolta hassou bechaabiyeto o ano mardekhech li essolta o lelbacha alm3aloum. darouri moukram akhtaa wa lkine moukram maknech bouhdo zid 3la dalik ennsa eli kay3erffo ettasyyyyir kay3erfo hafawat almizaniyat o anou machi kolchi 3ando facture o hadchi aaaaaaafat la comptabilite marocaine ok....zaydoune 3lach machfenakech ktabti 3la weld bouziyane oulla ban lik had elbarlamni men ha9o ikoun barlami bla monjazat wala hta ittisal...3lach madouitich 3la elfa9ihi bi nafss alhida achnou kay ban li bi anou alfa9ihi howa sahbak marramarra katdir chi m9al ghir bach thyed 3lik al3ine...dir haja f rassek hna les guaraoui machi nta eli ghadi twerina achnou ghadi ndirou moukram oula ghiro hna mamhtajinech chi had iwerina chkoun nkhtaro.. khali had emontada fih chi haja mofida min ghir had elmochadaaaaat eli bayena ana 3andha halfiya siyasiya ha9ouuuuuuuuuda wa chokrane

ألالة خديجة الله يهديك
واش داوية من نيتك ولا بيك حديدان ؟
أحترم رأيك أي نعم لكن كنت أنتظر أن تعلقي على الحقائق الفاضحة التي جاء بها تقرير المجلس الأعلى للحسابات و ليس حديدان من أتى بها ، أما أن تتمحور مداخلتك حول شكوك و أباطيل و عاطفة ميالة إلى السيد محمد مكرم فهذا أمر مردود عليك و يسلب نقدك كل موضوعية.
و مع ذلك سأجيبك نقطة نقطة دون أن أتعمق أو أسرح بعيدا عن مشاركتك ، راني ثرثار و كلامي نار و و غادة تجيك لخبار واش انا كذبت و لا مكرم شفار ؟
أولا : نتي باين ليا ما عايشاش في الكارة و معانيتيش من لي عانينا منو جميع و هذاك الشي علاش كيجيك كلشي زوين من بعيد.
ثانيا : مكرم ممعقد حد و حنا كننتاقدوه كمسؤول أما كولد لبلاد فهو على الراس و العين بل انا من أصدقاءو من أيام كورة.
ثالثا : المنتدى ماشي ديال بّا و هو مفتوح في وجه الجميع و لي بغى يكتب شي حاجة يكتبها و ما أنا إلا عضو كباقي الأعضاء و إدارة الموقع فاتحة المجال أمام الجميع و كنظن حتى مكرم يلا بغى يدخل يدافع على راسو فأهلا و سهلا به و ماشي أنا لي غادي نمنعو من حق الرد و لكن هو ما ردش حتى على تقرير لي تقدم أمام أنظار جلالة الملك ما بقى غير يتسوق لحديدان.
رابعا : أنا ما فرضت رأيي على حد و ذاك شي لي كنكتب موثق و بالأدلة و عند جهات رسمية و ما كنقولش للناس ثيقو بيا بزز.
خامسا : مكرم جاوه جوج لجان حيت كحلها كثر من أي رايس آخر و حيت مغرب اليوم ماشي هو مغرب الأمس و الملك أسس عدة لجان لمحاربة الفساد و الرشوة و ما شابه.
سادسا : شكون قاليك مكرم ما كانش راضخ للسلطة ؟ كاين شي حد في المغرب عندو الشجاعة باش يواجه السلطة ؟ ماشي مكرم لي كان صاحب الباشا لقديم من الروح للروح ؟ ماشي مكرم لي كان كيتشاد هو و الباشا من ليدين و يدورو يتفطحو على الضعفاء ؟ سيري سولي مع راسك.
سابعا : شعبية مكرم باينة و الدليل أن صحابو كلهم سقطهم الشعب في الانتخابات و نجحت الحمامة بالأغلبية الساحقة.
ثامنا : نتي عتارفتي بأنه ما كانش بوحدو يعني في النصب و النهب يوا علاش كتدافعي عليه رغم ذلك ؟
تاسعا : التسيير ألالة أمانة و كلشي خصو الفاكتورة و هذا هو القانون و حيت الفقيهي راجل قانون فهمها و تكى كيطحن في المواطنين عوض ما يضرب الميزانية.و التقرير ما دواش على الفاكتورات بوحدهم راهم تعبئات هوما و حوالا و مشروبات و فلوس ....إلخ
عاشرا : انا من أشد خلق الله عداوة لولاد بوزيان و كتبت موضوع مطقطق على الزعيم أما البرلماني معنديش معلومات و وثائق و أدلة عليه وانا خوفي من الله و تربيتي مكيسمحوش ليا نلوح الباطل على شي حد ظلما. و زيدون ياك مكرم ديالك لي كان كيجري معاه في الحملات ديال البرلمان ماشي حديدان .
أخيرا : أنا من أوائل من انتقد السيد عمر فقيهي و منذ ترشحه و حتى قبل أن ينال رئاسة المجلس و لقد أعطيته حقه من النقد في هذا المنتدى و لتقرئي كل المواضيع قبل الحكم و صحابو كذلك مرحمتهومش و أغلبية المواضيع عن الحمامة و ناس الحمامة.
ختي خديجة بالله عليك و بينك و بين ضميرك واش هاد شي لي وقع و كيوقع في الكارة ما ضركش في قلبك ؟ كلام حديدان غادي مع الريح و لن يغير من الوضع شيئا ما لم تتغير الشخصية الكاروية التي تتعامل بالعاطفة و ليس بالمنطق . نعم من حقك أن تكوني متعاطفة مع السيد مكرم لكن يجب أن يكون تعاطفك معه بناء لا أن تشجعيه و تختلقي له الأعذار.
و قبل تسليمك الكلمة للرد أؤكد لك أنني لا انتماء حزبي لدي و الله شاهد على ما أقول و لا مصلحة لي و لا حساب أصفيه لا مع مكرم و لا غيره و لا أستطيع التأثير عليكم معشر الكارويين و نتوما عارفين شكون تختارو و العربون باين من كل هاذو لي ختاريتوهم في تاريخكم كامل.
و شكرا ختي خديجة.

إلى الأخت الكريمة خديجة :

أصالة عن نفسي و نيابة عن طاقم الإشراف أتقدم إليك بجزيل الشكر على الثقة التي منحتها لمنتدياتنا بتسجيلك و مشاركتك.
أختي نحن في هذا الموقع مجموعة من الغيورين على الكارة و همنا أن ندافع عن الصالح العام و أن نقطع دابر المخربين و ناهبي المال العام و نحن ليست لنا عداوة شخصية مع أحد و لا حسابا نريد أن نصفيه و لا أجندة سياسية نخدمها بل إن أغلبيتنا الساحقة غير منتمية بل و لم يسبق لها أن شاركت لا من بعيد و لا من قريب في مهزلة الانتخابات .
السيد الرئيس السابق كمواطن مرحب به إن أراد الرد أو التواصل معنا أما كمسؤول فمن حقنا معاتبته و محاسبته.
و نحن لا نركز عليه لعداوة أو دعاية سلبية و لكن لتوفرنا على معلومات كثيرة بشأنه.كما أن كثرة المواضيع التي نشرت مؤخرا عنه ليس لها هدف معين و هي في الحقيقة موضوع واحد.فنظرا لطول التقرير تم تقسيمه إلى خمسة أجزاء مع مقدمة و خاتمة مما أفرز سبعة مواضيع و لكنها في الأصل موضوع واحد و لكن نظرا لطول التقرير و اجتناب إصابة القراء بالملل أشرنا على أخينا حديدان بتقسيمه.و أؤكد لك بصفتي أحد المشرفين على المنتدى الثاني حيث نشرت المواضيع المذكورة أن هذه هي الحقيقة.
أتمنى أن تتفهمي موقفنا و أن تتقبلي شرحنا بكل الحياد الواجب لخدمة الكارة.
و السلام.

نيابة عن أعضاء طاقم الإشراف.