ماغادينش نحنيوا ليكم الراس

الفايس بوك اختراع امريكي ،جوج الصحاب طوروه وبداو غي بالضحك ،وشوية انتشر في امريكا ومن بعد بقية العالم ،الشباب العربي استغلوا احسن استغلال خصوصا ف جمهورية مصر العربية ،من خلال صفحة خالد سعيد اللي كان ضحية ديال الشرطة الفاسدة ديال مدينة الاسكندرية ،الشباب ما رضاوش وشافوا الحكرة وانهم كلهم مهددون ،صفحة خالد سعيد دخلها الالاف المصريين في يوم واحد تمت تعبأتهم في ايام قليلة وخرجت المظاهرات وتم اعتقال مؤسس الصفحة ،الناس كانوا على سبة تجمعو الالاف ثم الملايين ،فكان مبارك في الحبس من بعد ،المصريين الان كيناقشو مصيرهم بطريقة ديمقراطية واخا كاينا شد ليا نقطع ليك ولكن كل الديمقراطيات العريقة مرت من تلك المرحلة ،احنا في الكارة شباب قليل ،بدينا قلال الكارة على قدنا وحتى مسؤولينا على قدنا ماشي شي حاجة نخافوا منها ،المغرب تقريبا كلو تغير ،وجلالة الملك بالحكمة ديالو قدر يفهم المغاربة ودار لينا دستور جديد وانتخابات طلعت من خلالها حكومة ديمقراطية ،نقدروا نتافقوا على طريقة العمل ديالها ولا نعارضوها هاذي هي الديمقراطية ،احنا في الكارة عندنا جوج مقدمين وشيخ وباشا وسلعة جدارمية وعصابة في المجلس البلدي كلها تقريبا من صحاب المواكن ومحامي منشار وبعض الاكسسوارات من الدمادم دافعينهم دفيع ،يقولو ليهم صفقوا يصفقوا ،العشق ديالهم انهم ينجحوا في الانتخابات وبأي طريقة ل
لكن غي يجلسو مع الباشا ويقربوا من المسؤولين الموظفين
باش يدافعوا عليهم الى كحلوها ،شباب الكارة غرقوه بالمخدرات وخلاو البلاد بلا أمن
وهادشي بلا علم السلطات العليا.
الكارة حولوها لضيعة ديالهم وهم ما في إيديهم والو ،لو إجتمعنا عليهم لطيرانهم تطييرا ،المغرب راه ماخاصوش المشاكل ،الناس باغا الامن وباغا الخدمات الاساسية واللي هي من حقها ،احنا في هاد المنتدى ماكنتكلموش من فراغ احنا غي يحقوا لينا الامن ويحقوا لينا مطالب اجتماعية ومانبقاوش ندخلو للفايس كاع.
سوريا كانوا الناس يطالبوا غي بتزفيت الشوارع وبالكهربا ،السلطات المحلية مفهمتهمش وقمعتهم وراه حالة البلاد كتشوفوها ،الانسان كيعيش غي مرة علاش تحرموه من حقوقو ،علاش تقمعوه ،حنا الشباب ماغادينش نحنيوا ليكم الراس كيفما كانوا والدينا وحق الله تا نغرقو معاكم ،ياك كاينا غي مووت وحدة .

واحنا راه جنود مجندين وراء جلالة الملك وراه غادي يسمع عليكم هاد الشي اللي كتديروا يغضب عليكم ،ويدخل باباكم للحبس .

بقلم نورة نورة