احذروا العضو سعيد العطّار ... لا تشريو من عندو الدار

هذا عطّار حطّ ما بقى طار ، يبان سكوتي و هو خطار ، إنه العضو أبوصلعة سعيد يا حضّار
كتبنا عليه غيرما مرة و ما أوفيناه حقه فدائما معه الجديد فمن الشعوذة إلى تكرّابيت إلى السياسة مرورا بشراء الذمم و تشجيع الفساد في أبهى صوره ، و اليوم يخرج علينا (وهو كان خارج علينا نيت مدة هاذي هو و صحابو) بامتهانه للنصب و الاحتيال و التزوير ... ربما يظن أن القانون لا يصل إلى المسؤولين و نسي أن عصابته الشبه سياسية قد تنكرت له و هي تحفر له الحفرة تلو الحفرة و قد يسقط في إحداها قريبا (من فمّي لربّي).
المهم السيد في أيامات الغفلة حصل على بقعة فبلاد الحاج الصالح (تجزئة لالة مريم) بطريقة أقل ما يقال عنها أنها ليست قانونية و ناض بناها ولا من يسوّل فيه و أشك أنه خاد رخصة او دار بلان مادامت البقعة من السّاس ما واقفاش على الصحّ قانونيا ... السيد هذيك الساعة كان من الأعضاء الجماعيين المرضيين و ماكانش مسخوط المجلس كيف دابا ملي دارت عليه الناعورة و ما قنعش بالفتات لي كيخلّيو ليه .
ما علينا السيد شرى باطل و بنى على عينك يا بن عدّي باطل و لي عطى الله عطاه ، لي كيهمنا هو اليوم ... سويعيد مطوّر فكّر مزيان و بانو ليه ثلاثة لحوايج :
أولا : هاذ الحكومة نايضة قاصحة مع المفسدين من البدية و تقدر مع الوقت تزيد فيه و ما تبقاش تشوف غير في المسؤولين المتورطين الكبار وغادي ولابد يأدي الثمن ملي غادا تسالي للصغار بحالو و المصيبة عند الأستاذ أبوصلعة أن هاذ الحكومة خرجت واحد القانون ديال البني العشوائي و زيّرت العقار و ناضت ريبت لشحال من واحد بل دروبا و أحياء على كدهم تريبو في شحال من مدينة ... القضية حماضت في راس سعدون بن صلعون و خاف يوصلو الصهد و قال مع راسو : هاذ الخربة ما عندها حتى ورقة و الوقت تبدّل و هاذ خياتنا ما كيتباعو ما يتشراو و الناس بدات تعيق أرى نتفك منها و نكركبها ما حدها باقا تجيب الثمن
ثانيا : القضية حماضت عندو حتى في الكارة ، هاهو تخاصم مع الرايس و أتباعه و هوما حالفين عليه و ما قبلوش يتصالحو معاه و بان ليه غادين ينجحو في الانتخابات المرة الماجية ثاني و نهار غادي يطيح بين إيديهم ما غادينش يعتقوهش ، يعني السيد حس براسو ما بقاش مكوفري و ولّا فرّادي بحال المواطنين لي موالف كيشري ، و قال مع راسو : هاذو كيما أنا عايق بيهم راهم عايقين بيّا و كيما عندي أسرارهم عندهم حتى هوما أسراري ، اللهم نفك الدويرة دابا و لا نولّي واحل يلا ناضو ليّا هاذ المساخيط و هاذي فرصتهم يلا فكرو ينتاقمو مني على خيانتهم غير ما طاحتش ليهم الخربة على البال .
ثالثا : مول الأرض لي بنى فيها بّا سعدون خربته باقي فدار غفلون أو لربما باقي خايف من المخزن ولا ما عندوش باش يدّاعى المهم باقي ساكت واخا مصيّد و شحال من واحد غير مترامي ليه على البقع و النهار لي غادي يا إيما يتشجع و يشوف الحرب لي بدات على الفساد و المفسدين أو يحرّشوه العديان أو يعيق أو ينوضو الورثة ، غادي يفكر يهجّج هاذ خيّاتنا لي دّاو ليه البقاعي باطل و غادي يدعيهم و يربحهم حيث ما عندهم حتى وثيقة تثبت البيع قانونيا و هذيك الساعة سويعيد غادي يكبّ الما على كريشتو المقيلقزة و تمشي ليه الفليسات لي خسر في البني باطيلة.
هذا ما دار في ذهن أبو مخيخ المنشلوطي و ناض كيقلب على شي ضحية ساهلة ماهلة ... و مع هو عندو مع لعيالات و لعيالات عندهم معاه و الثقة و لله الحمد متبادلة و الأسرار و التيبيخات كذلك بدا كينوعر في الوسط النسائي الببغائي (وحدة تقولها للأخرى) إلى أن عثر على ضالّته في شخص السيدة السعدية المعروفة بمرات ولد البولانجي و تاف قمعاها على البيع و حدّدو الثمن و يا الله يا الله و فرح سويعيد ملّي شدّ من عندها العربون و هذا الله و هو عارف آش كاين ... السيدة مسكينة على نيّتها بغات تتكاتب معاه و عيى ما يتهرّب منها و لكن ملّي وصلو للصّح ما لقات عندو وراق ثبوتية قانونية تثتب أن الأرض التي بنى عليها خربته في ملكيته حقا و بالقانون ، يوا و ناضت الهيلالة و عيات تدفع ليه في الناس و عيات ما تمشي عندو والا بغى يدير معاها القانون أو يردّ ليها العربون ...و فآخر المطاف وكلت أمرها لله و لكن من بعد ما دارت ليه شوهة و ضربت ليه الطّر قدام دارهم و قدّام حانوتو و فضحاتو و لكنه كالعادة حدر قمقمو و تكمد على الريالات و خلّاها تطرطر ...
ألالّة السعدية واش سويعيد يتبايعو معاه الناس ؟ واش لي هو متعود يشري البشر يشري من عندو شي واحد ؟ واش كنتي كتحلمي تديري أفير مع سمسار ؟ واش هذيك الكمّارة يربح معاها الواحد ؟ واش مالقيتي غير هذا تشري من عندو و هو فيه شفّار و سيّاسي و عطّار و خمّار و مخلوض و منافق و جبايهي و غمّاق و زيد و زيد ؟ ألالة يلا كان حتى القانون لا يحمي المغفلين فإن الكارة كتعطي للوذنين لبني غفلون
ختاما سعيد سعدان أو السعود باقي كيبيع و يشري في بيت بني على أرض لا يملكها قانونيا و باقي كيقلب على ضحايا آخرين و لي طاح بين إيديه غادي يطحنو و هاذ شي علاش حنا كتبنا هاذ الموضوع باش نقولو لبني غفلون : حضيو روسكم لا يفوزو بيكم الذبان يا فلان واش لي صيدوكم في التسيير غادين يزكلوكم في التنوعير ؟؟؟؟

كيقول المثل : قال ليه شمتّك قال ليه عرفتك

يوا باقين ما عرفتوهم زعما ؟ و باقين كتتعاملو معاهم ؟؟؟ يوا إيديكم على بلاغيكم ... انتهى الكلام