لاجودان غادي دابا يوا بالما و الشطابة

انتهت مهمة قائد سرية الدرك الملكي بالكارة و كما أقيم له حفل تكريم مطلع هذا الأسبوع أبينا إلا أن نكرّم السي احمد على الطريقة الحديدانية ، و واخا شحال كرّمنا فيه طوال سنين ما عطاتناش نفسنا المذكورية منتصيفطوش معاه حتى حنا ، يوا باي باي سيدي احمد مول القرعة مول : جبد.....
إذن لاجودان سي احمد بوقشابة غادي محول من الكارة دابا و حنا كنقولو ليه نعاماس بالما و الشطابة ، مع الفساد لعبتي حابة و ميكتي على الڭرابة و ملي كتبغي تخدم كتحڭر على الطلابة أما البزنازا و موالين طابة هذوك عندك من الصحابة.
السي احمد بوقشابة كانت قشابتو واسعة مع تجار الممنوعات و العاهرات و السمسارة و عصابات الفساد و زيد و زيد ، و القشابة الواسعة حتى جيوبها كيكونو واسعين ، يوا معلوم راه الحبة داخلة و الكارة عند الجدارمية هي لاس فيڭاس ، كيجيها الجدارمي ما ظان ما حاس حتى كيولي يلعب بالجوهر و الماس.
السي احمد بوقشابة من فعل قشّب يقشب (بحال قرقب يقرقب بحال ملي كيقرقبو هوما على شي واحد وحنا تاحنا كنقرقبو عليهم ملي نشدو عليهم شي حاجة) ، سيدي احمد مول اجبد كان عزيز عليه التقشاب مع الصغار و مع لكبار مع الطالحين و الصالحين (يا الصالحين) حتى رجع تقشابو بسالة و مشات هيبتو للزبالة و ولى الأمن حالتو حالة.
كان إخواننا (الله يذكرهم بخير) في منتدى الكارة ضحية أبنائها قد أعطوه حقه ، ماشي من الڭرمومة ، من النقد ، فكتبوا عن إدمانه على الخمر و معاقرتها رفقة أصدقائه في سيارات كانوا يوقفونها بمحاذاة مركز الدرك الملكي (آش خلاو للسكايرية ما يڭولو) حتى صار المخمورون يجرؤون على العرعرة (من التعرعير) في الشارع العام بل و في الشارع الإداري ، و بعد ان كتب عنه الإخوة أصبح أكثر تسترا و أقلع عن السكر في الشارع العام.
و كتبوا عن تركه لعمله و الذهاب إلى إحدى الخرابات قرب مقهى نصيف للعب الكرة الحديدية و ببدلته الرسمية مع ما يرافق ذلك من لغو و صراخ و مشادات و خصام ... و كان عنوان الموضوع الذي أشار لهذا هو "قائد سرية الدرك الملكي بالكارة يلعب " لمن يذكره ، فأقلع المسكين عن ممارسة لعبته و أصبح يشتكي لمن يريد سماعه قائلا "آش بغاو عندي ياك غير كنلعب" ، يوا اسي احمد حيد التوني العسكري و لبس توني رياضي و سير تلعب عيب غير يلا دوا معاك شي حد ، و سير لعب ملي متكونش خدام ماشي تخلي خدمتك و السيبة محكمة في لبلاد و تمشي تلعب.
و كتبوا عن تصرفاته في مقهى نصيف حيث كان يقضي معظم وقته عوض التواجد بمكتبه ، و من تلك التصرفات مشاهدة مباريات كرة القدم و الصراخ مع الصارخين و القفز مع القافزين و بالتوني لي ماشي رياضي واخا الحفل رياضي أي أنه كان يفعل ذلك مرتديا للبدلة الرسمية و كلما سجل فريقه هدفا إلا و قفز من مكانه ممسكا بكلتا يديه بنجمة المخزن التي على صدره و موجها إياها نحو مشجعي الفريق الخصم داخل المقهى ... اشنو زعما النجمة فيها شي كتاب و لا حرز ولا الريال خاف منها و خلى البارصا تسجل ؟
و كتبوا عن مضايقاته لأهالي بعض الفبرايريين و تهديداته لبعض المناضلين في الأنترنت و على أرض الواقع.
و كتبوا و كتبوا و لكن السي احمد ولا هو هنا و رؤساء السي احمد ولا هم يحزنون ... و بقي يجرجر في ولايته حتى أيامنا هذه منتظرا حصوله على المعاش باش يهز لفليسات و الفراش و يقول أجيو نلعبو قاش قاش و غير نغمضو و بحال يلا معمرو معانا عاش ، و كان هنا و مشى و تهنا و خرج الله عاقبة سربيسو على خير و دا معاه الخير و الخمير و خلا غير لبغال و الحمير (ها البرڭاڭة ، ها لحاسين الكابة ، ها السماسرية ، ها المنتخبين المتوسطين للمفسدين و المفسدات .... إلخ إخّ إخّ إخّ) و بقي هؤلاء اليتامى يتباكون على زمن السي احمد بوقشابة لي شبعات فيه العصابة و كثرات فيه الرقابة على الأحرار و الغلابا.
ها سي احمد مشى عليكم و ها واحد كرف منو جاكم : أجودان جديد بكسوتو دخل للكارة ببلغتو و أول ما فعله هو الاتصال بكل تجار الممنوعات و ليس لتحذيرهم بل ليقول لهم يوا سمعو معايا مزيان ، قاليه يا سيادي : " غير تسترو " يعني بيعو ولكن استعينوا على بيع مصائبكم بالكتمان ، واش هذا أجودان ولا حرامي خارج من اللومان ؟ أيام زاهرة تنتظر لوبيات الفساد ، لكن لهذا الحديث مواضيع و مواضيع و ماغادينش نزڭلوه يلا بدا يشري و يبيع و خبارو معانا لابد غادة تديع . على أي ليس هذا بموضوعنا لأننا اليوم بصدد تكريم لاجودان الذي كان الصغير و الكبير يناديه بسي احمد ، أودي أسي احمد أودي ؟ فبعد التكريم الذي أقيم له هذا الأسبوع بعد تسليمه مكانه لخلفه ، أقسمنا أن نكرّم أيضا السي احمد (مالو رخيص علينا) و قررنا أن يكون تكريمنا له على إهماله و تجاوزاته و شططه على شكل موضوع نختم به الماتش (ياك هو عزيزة عليه كورة يوا تكون عندو روح رياضية و يقبل منا هاذ الهدية) ، و فضلنا ان يكون تكرمنا له من كرّم يكرّم و لا علاقة له لا بكرم المذاكرة و لا بتكريم القدماء الذين أعطوا للبلاد و العباد و ليس الذين نهبوا العباد و سيّبوا البلاد ، حنا بغينا كيف ما كرّمنا نكرّموه في التوالي ديالو و بغينا نتصيفطو معاه بشي موضوع يلخص دون إطالة راه شلا و ما يتقال ما عرفه عهد سيدهم احمد من سيبة و تسيب و فساد ، و راحنا صورنا ليه كاع المواضيع لي تكتبت عليه و لا على جدارميتو و على الحالة الأمنية عموما في مدينة الكارة إبان خدمته و غادين نرسلوها ليه يديها معاه ذكرى يبقى يذكرنا بيها ولا يديرها في حجاب و يعلقها تحت التوني ديال الكرة الحديدية لي غادي يولي عندو الوقت باش يلعبها حتى يموت ، يوا عنداك غير يـبدى يقول : راني درت مشاريع و ما بقاش عندي الوقت باش نلعب ولا نتفرج ، أهّاه و ملي كنتي هاز أمانة المخزن و هاز مسؤولية ديال مدينة بعشرين ألف روح يا مول الرواح ، هذيك الساعة كان عندك الوقت .
يوا آش غادي نقول ليك يا وليدي يا سي احمد خليتيها سايبة سير الله يسيبك في شي مصيبة و تكون صعيبة ، سير الله يلڭيها ليك كيف ما لڭات كل لي دازو من الكارة و نهبوها.و هذي دعوة مظلوم و ياويل الجبابرة من دعاء المظاليم.
و أختم هطرقتي كالعادة بمثال يكون في صميم الموضوع و لم أجد اليوم أفضل من هذا (لا تعدّو : أي ما تعدّوش ، ما تعتابريهش و متراعيش ليه) :

اللي ما يقدّرك لا تعدّو ، و لو كان السلطان جدّو.

بالما و الشطابة و الجفاف و الكراطة.