الانتخابات كيف غادة تكون مع بني كلبون ؟ (الخبيرة الثالثة)

بعد أن أسهبنا في الحديث عن مجموعة من الاستقلاليين الجدد ، ماذا عن البوفرطوات اللواتي تعمرن مجلسنا الغير بلدي مثلما تعمر دمى المانكانات واجهات محلات بيع الألبسة الجاهزة ؟

لالاهم لعجيلي و صلا و سلام على رسول الله يلا جا يلا جاه سيدنا محمد الله معاه جا العالي يو يو يو يو يو هذي على الرايسة تاعجيليت ، هذه الممرضة التي مرّضت كل من يسمع لها مشتكية أنها تمحنت مسكينة في خدمة الناس ، لا تكف عن الدفاع عن حجاج المجلس و خصوصا منهم أبناء أمهاتهم و على رأسهم ولد الولدية و ولد عايشة مدعية أنهما يخدمان الناس و ينفقان من مالهما الخاص في سبيل الصالح العام (الصالح ؟ يلا كان شي حد سميتو صالح ربما أما الصالح العام ديال الصح راه بعيد عليهم).هذه السيدة يا إما مكفية عليها الڭـفة أو هازين ليها الڭـفة ، وحدة فيهم أما باش تقول لينا أن هذوك الناس مساكن محنين معانا فهذا ما لا يثمنه واقع الحال . ياك ألالة نتي من الأول غير تابعة يوا بقاي تابعة كيف الأمانة و فين ما حطوك شدي الأرض و شدي فمك و عرفي آش كتقولي إلا يلا بغيتي تولي ضحكة بين الناس أو يلا بغيتينا نجبدو الربعمياوات بل و الربعينات لي عارفينك بيهم رواد المستشفى القديم بل و حتى الجديد يوا هنينا راحنا كنحترمو ديك الجلبة لي داڭة لينا و لي شركنا بيها الدم أي أي وعتتينا.

بوفرطوة المجلس الثانية السيدة حرم ولد اليوسفي دارت نفس على المجلس و ناضت كتغوث في العمالة مهددة باستقالة جماعية لأعضاء المجلس البلدي ، و علاش هاذ الحيحة كاملة ؟ حيت التجار كانوا دارو وقفات احتجاجية ضد إقامة المعرض التجاري و تفوهوا ببضعة كلمات في حق السادة الأعضاء ، كلمات ما تسرطاتش للسيدة اليوسفي و هزتها النفس و أرعدت و أزبدت و غلغلت و حيحت و قامت توكوك لعباد الله ويك ويك أعباد الله ناسية أن من تدافع عنهم يأكلون أرزاق عباد الله و لا يخافون لا الله و لا عباده . أهاه هذيك الهضرة ما تسرطاتش ليك أمدام اليوسفي و تسرط ليك ڭـاع الشي لاخر ؟ علاش منضتي شحال هذي ملي كنتي في المعارضة توكوكي و تزوكي على المصايب لي كيديروها هاذو لي كتدافعي عليهم اليوم ؟ ولا باغة تديري ليك بلاصة و لراجلك بليصة مع الفقيهي و رباعتو ؟ يوا ماشي بهاذ الطريقة ألالة و ماشي على ظهر المظلومين و الضعفاء ، كوني غير مرا حادڭـة و شمري و ديري لحبابك الجداد شي زردة فاعلة تاركة و ضربيهم لكراشيهم و راكي تكسبيهم راهم كلهم زرايدية و مرايقية من الدرجة الرفيعة ، أما أنك تنوضي وسط الشلاغمية و بلا حشمة بلا حيا و راجلك حاضر كيشوف و تحيحي هذيك التحييحة فهذا ليس من شيم بنات الأصول ، أم أنهم حرشوك على السيد العامل و ولاو يدفعو لعيالات و يتدرڭـو بجلايلهم ؟. و بينتي حنّة إيديك و حنّة هيا ، من اليوم فصاعدا إذن سأدعوك الرايسة تيحيحيت (مشتقة من الحيحة) .

هذا عن الزوجة فما حال الزوج ؟ المعارض الشهم زعما السي محمد اليوسفي : البارح في المعارضة حابس سيتيرنة الجماعة وسط الشانطي مانعها تمشي تسقي فيرمة الرايس و مهدد شيفورها بتفرڭـيع الروايض يلا تحرك ، و اليوم شبح في ظل نفس الرايس يلحس كابته و يمشي في ظله بعد أن خان المعارضة و الحزب الذي حمله إلى السلطة ، سبحان مغير الأحوال و صافي . السيد تسوف و دار ب180 درجة وجا و جاب معاه حتى المدام تدافع على عدو الأمس .سيدي محمد و سيدنا و سيدك رسول الله ، ما هكذا يكون الرجال ، فين هي هضرة القهاوي ولا زبل القهاوي حاشى السامعين يبقى فيها ؟ فين هو الغوت و النفيسة و غادي ندير و غادي نفعل و غادي نترك أودي غير سير تبرك راه يلا زدتي غادي تعرك و ڭـول لمراتك تمشي تعجن و تفرك قبل ما أسرتك تتفرتك أو مراتك تولف الحيحة و تولي عليك تدردك .

زيد على هاذو خياتنا الدريويش عبدالمجيد الرياحي حتى هو و لي ولف يخدم في مواكن الحصاد في الصيف حتى ولى يصحاب ليه سنان المواطنين سنابل أينعت و حان قطافها فشرع يدمي فم هذا و يسب ذاك و يتعنتر و هو لا يساوي شقفة لوحة أتحداه أن يكتب عليها بالطباشير كل أحرف الهجاء هو الذي آحترف هجاء أشراف الكارة بل و ضربهم و كلما رأى القضية حامضة لامضة إلا و ضربها بموتة حمار لو رأى وجهه في المرآة حينها لبادرته أذناه الطويلتان و فمه الهرناط ، الناس يطلبو السلامة و الشفاء و وهو يتخذ من مرض السكري عذرا للاعتداء على الناس حتى صار أعضاء المجلس الغير بلدي يدفعونه كي يلوح الباطل على من يريدون فيه الخدمة ، كون غير سخف شي سخفة لا يقوم بعدها أبدا فيسلم منه الناس.

غريبة هي مجالسنا واحد في مجلس سابق قاليك مركب المڭانة و خصنا نتكايسو عليه واخا هو مكانش مكايس علينا و لي كان لي هضر معاه يبدا يتبوحط و يهدد بسكوت مڭانته و إثنان في المجلس الحالي تثور ثائرتهما واش ڭاليك : فيهم السكر و مخصناش نديو عليهم واخا يصوطونا ، و الرايس حتى هو منعرف آش عندو حتى هو غير على سبة ڭاليك كيعواج و يتشلل ، أسيادي الله يشافيكم ما تشفينا فيكم ولكن المجلس راه ماشي غرفة الإنعاش ولا مع ماقاريينش سمعتو أن المجلس البلدي فيه الإنعاش الوطني تصحبوه الإنعاش ديال المرضى و جيتو تنوعشو مع روسكم على ظهر الشعب ؟ لي مريض يبرك في خيمتهم و يقابل صحتو و يمشي يداوى و خليو الناس لي باغين يخدمو يهلكو صحتهم شوية حتى يركبهم السكر و تشدهم كل أمراض الدنيا بفعل الإرث الملغوم الذي ستتركونه لهم من كريديات و ضواصا خامجين و بنيات تحتية مغشوشة و ميزانية سخفانة و هلم جرا مرضا و ضرا و سما و شرا و بنديرا و طرا.

و على ذكر البندير و الطر يتبادر إلى ذهني الڭـنابري مول العود لي ضربها بنكرة للبيئة و للتنمية و للكارة حتى هي و خاف اللحايا يمنعو العيوط و يولي كل فنان مسخوط و يتشدو الشيخات في المعتقلات و يتعدمو الكوامانجية في الساحات العمومية ، و هو يقصد و المقصود الله سيدي رحال مول الحبال لي سمع بيه يتربط و يتعقد ليه لسانو و يولي غير يهرنط ، فطلب التسليم من مول الميزان وارا ما يعورط و نسى ما كان يقول في الفقيهي و رباعتو و نسى أنه كان معارض و شحال
من معارض للسي الفقيه...ي هداه الله بقدرة قادر فدخل في السرب بالخف و اصطف في الصف و قطع الحس و النف يا ربي تلطف ، ولد البوعزاوي هذا جا و جاب و دخل للاستقلال و معاه البيادق ديالو أو من تبقى منهم و منهم شباب ڭـاليك مجاز ، فاش في بوطاڭاز ؟ السي صالح و كون غير كان صالح ڭاليك كان باغي يصلح و كون كان الخوخ يداوي كون داوى صالح : القصاير و التسمسير و السكرة و الفساد و التنوعير و التبزنيز و النفاق و التمسكين و التحلوين واهيا وين آهيا وين ...و خربوشة و البرهوشة و الڭريمات المغشوشة و سمّ الحنوشا ، سير حتى تحيد الكوشة راك باقي صغير على السياسة و سياستك نتا مفروشة و روايضك من البدية مفشووووشة .

الحاصول و ما فيه : ها الكاس حلو

شيّبتونا قبل الوقت الله يشيّبكم