أخطر المفسدين : زاڭـورة مول الناعورة (الحلقة الثالثة)

بعد حلقتين من السلسلة الدرامية "زاڭـورة مول الناعورة" و إن رأى فيها البعض سلسلة هزلية ولا تناقض في ذلك (راه كثرة الهم تضحك) ، نترككم اليوم مع الحلقة الثالثة و التي لا نعرف إن كانت ستكون الأخيرة أم لا وإن كنا متأكدين أن زاڭـورة من شاكلة الأبطال المكسيكيين التي تطول أطوار مسلسلاتهم و تطول و تطول وأنه غالبا سيحتم علينا الواقع العودة بموسم جديد مستقبلا لهذا العمل الإبداعي ذو السيناريو المستوحى من فعايل جحا الڭـارة و تحرميات بهلول الأحزاب و تشقلبات بهلوان السياسة : شاروخان بني نعسان زاڭـورة ذو العشرة ألوان الذي لا تعرف إن كان من الإنس أم من الجان .
زاڭـورة أعتبره أخطر و أذكى عنصر بالمجلس البلدي الحالي و لا أستبعد أن يكون العقل المدبر لكل دعاوي البلا التي تصدر عن الأخير كما أنه يتمتع بحاسة ماشي غير سادسة بل سابعة و ثامنة وزيد و زيد ، السيد كيشم الجهة الغالبة قبل أي كان و لذلك تراه يشتغل مع جهة و يده ممدودة لجهة ثانية و عينه تنظر إلى جهة ثالثة و عقله يفكر في الجهة الرابعة ... و كمؤشر على صحة ما أقول اعلموا أن زاكورة قبل الانتخابات التشريعية الأخيرة بدأ يفكر في الانضمام لحزب العدالة و التنمية عندما لم يكن أحد يفكر في إمكانية فوز المصباح بل أظنه كان وراء إقناع رئيس المجلس الحالي عمر فقيهي بمحاولة الحصول على تزكية لامبة و الترشح بإسمها في البرلمان لكن لحسن حظ الڭـارة و سوء حظ العفريت زاڭـورة أن رائحتهم فاتت الڭـارة و فاتت برشيد لهيه فرفض حزب العدالة و التنمية تزكية الفقيهي في الانتخابات الماضية ، بل إن زاڭـورة أقنع ولد الولدية الذي لا يفقه شيئا في السياسة و الذي كان يكره المصباح بأن مستقبلهم المصلحي لن يضمنه اليوم إلا التشعلق بركب العدالة و التنمية حتى أصبح ولدالولدية يهتهت بالانضمام لهذا الحزب ، بل أكثر من ذلك فزاڭـورة في الانتخابات التي مضت كان يقوم بالحملة مع الميزان و كلما مر ركب الاستقلال بمكان يقف فيه ملتحون أو متعاطفون مع المصباح إلا و ينبري زاڭـورة مبتعدا عن رفاقه و متوجها بالكلام لمن يشم فيهم رائحة المصباح قائلا بطريقته المعروفة : "تحية نضالية للعدالة و التنمية" ، و العجيب أن هاذو لي كيحييهم بكل هاذ الحرارة هوما لي في الحلقة السابقة قلنا أنه كان كيحاربهم و يجمع عليهم في الخبيرات و يقول ليهم : "ياك عيتو ما تغوثو آش صورتو"...اليوم عاد بان ليك النضال يا العنطيز؟ خطير خطير خطير إلا أن هاذ القضية ما غاداش تصدق ليه لأن الحزب الوحيد في العالم الذي لن يقبل بزاڭـورة هو حزب العدالة و التنمية غير يمشي يكب الما على كرشو و ما يخرجش للعار مع صحابو راه أقسم له بمن لا يتقيه أنه لن يحصل على تزكية حزب المصباح ولو كبواب فما بالك كمرشح و أتحداه أن يدخل إلى هذا الحزب كمجرد عضو إن استطاع ، فما تبقاش تحلم أبّا زاڭـورة هاذو ما تقدرش عليهم و متعرفش ليهم حيث ما كيشربو ما كيقصرو ما كينوعرو ما كيتلوطو ما كيزوّرو ما كايسمسرو ما كيدوّرو ما كيخندشو ، سير بقى مخزون تحت جناح لحميمة راه حتى الميزان شي نهار يعبرك مزيان و يعرف ما عندك قيمة و يدردبك ، ولا شوف ليك مع التراكتور دير شيفور فيه و هذي نصيحة أخوية و تحية شلاهبية لزاڭـورة بالجلابية.
اختصاص آخر للسي زاڭـورة و قليل من يعرف عنه ذلك فهو سمسار ليس فقط في الانتخابات بل في الحصول على شهادات الزور بالمقابل طبعا فكل من احتاج لشهود زور في قضايا الإرث أو في المحاكم أو عند الدرك و السلطات و غير ذلك ما عليه سوى الاتصال بزاڭورة و التفاهم على الثمن و زاڭـورة يتكلف بإيجاد عدد الشهود الذي تحتاجه و يزيدك شهادتو فابور يلا بغيتيها ، هذا عاد نتيقو فيه و نعطيوه مصير المدينة و آلاف السكان ديالها؟
و كما سبق وقلنا فلزاڭـورة أسلوب خطير في التأثير خصوصا على من تقل أعمارهم عن 20 سنة أي فئة اليافعين ، هاذ الفئة كتموت على زاڭـورة حيث كيهبط عندهم للأرض و كيخاطبهم بلغتهم و يدخل معاهم في التلواط و الدريات و البلية كل حسب اهتماماته و كيعطيهم وقت و يوقف معاهم و يخبّـر ليهم و ينكث معاهم و يضحك معاهم و كيدخل ليهم شي حوايج غير بالفن يعني كيعرف كيفاش ياكل ليهم دماغهم و يجعلهم يكفرو على شي وجوه بحال المنافس القديم ديالو بوزيان الزعيم.و لذلك فإنك تجد أغلب المصوتين على زاڭـورة من الشباب و العيالات و هذا خزان للأصوات يحافظ عليه زاڭـورة بكل ما أوتي من مكر و حيلة فمثلا في الدرب ديالو نستطيع أن نجزم أن سبعين في المائة ديال الشباب ما بين ثمنطاش و عشرين عام كيصوتو عليه.
و علاش قلنا لعيالات حتى هوما ؟ حيث العفريت عندو مع لعيالات و خصوصا عيالات الرجالة و هذي معروفة غير لي بغى يتعامى و هو كيفتاخر أن عيالات الرجالة هوما لي كينجحوه و كيخليك تقرأ ما خلف السطور و تفهمها كيف بغيتي ، فإلى رجال الدوائر التي يترشح فيها هذا الثعلب : "حضيو عيالاتكم راه معاكم ذيب و لي شاف مرتو لاصقة باغة تصوت على زاڭـورة يعرف القضية حامضة و السيد غير يلا بغيتو تتناساو راه معروف بالفساد و قذف المحصنات و الزنى بهن".
و قضية أخرى من غير تسخير فرجه و لسانه للحصول على أصوات لي كينجحوه ، السيد كيستغل الجهل ديال الدراري الصغار و لعيالات بالقانون و بالحقوق ديالهم و كيدير فيها خدوم و كيوقف مع الناس : لي بغى إيكسطري ولا شهادة السكنى و لا ورقة الخلق أو أي حاجة إدارية كينوض هو يتكلف بيها و يجيبها ليه حتى للدار ولي بغيتي توعيه كيقول ليك : "زاڭـورة كيقضي لينا و كيوقف معانا في القيادة و لي بغيناها كيقادها لينا" ... يا بشر هذاك راه حقكم وأنتم لا تحتاجون لا لزاڭـورة ولا لباكورة باش تحصلو على الحقوق ديالكم ، هذا راه زمان آخر سير أخويا لأي إدارة و طالب بحقك و هذيك الساعة يلا ما بغاوش يعطيوه ليك و هذا مستبعد جدا أجي عندنا و غدين نفرجوك فيهم و بلا متضصر زاڭـورة و أمثاله و تولي عبد ديالو لا تستطيع الحصول على شيئ إلا بتدخل منه ، هذاك راه نوع من أنواع بيع الذمم والبحث عن المصلحة الشخصية عوض المصلحة العامة ، يوا نتا كتقلب على مصلحتك يوا لاش كتلوم المسؤولين يلا ضربو على مصلحتهم شوف و سكت ؟ الإصلاح يبدأ منكم و هذا الكلام موجه للمغرر بهم من طرف زاڭـورة و أمثاله الذين يستعبدون الخلق بقضاء أمور هي في الحقيقة في متناول الجميع غير لي ما بغاش.
مسألة أخرى السيد جاقورة يعد المصوتين عليه بتمكينهم من خرق القانون ، و فينكم يا صحاب القانون ؟ و لا القانون غير على المناضلين و الضعفاء ؟ بحيث أنه وعد كثيرين بالسماح لهم بالبناء عشوائيا بعد نجاحه و فعلا بعد فوزه نبتت بنايات عشوائية نهارا جهارا و لا حسيب و لا رقيب ، فينك يا الباشا و فينكم يا لمقدمين و لا حادڭـين غير في دوار بلال و حاضيين غير معانا حنا تجمعو علينا في لخبارات و تعمرو في الضواصا؟؟؟
نصل الآن إلى سياسة زاڭـورة و بعض أسراره في الحملات الانتخابية : أول حاجة السيد تقريبا ثلاثة أو أربعة أشهر قبل الانتخابات كيتبدل و كيزيد يهبط لمستوى ديال الناس و كيكثر فيه الصواب و السلام و الجري في الخير و يبدا يتمسكن في انتظار أن يتمكن و يخدم التشلهيب و تحراميات أكثر فأكثر مع اقتراب موعد الاقتراع ... غادين تقولو ليا هاذ الشي كلشي كيديروه ، صحيح كلهم و لكن زاڭـورة مكيتسناش الحملات الانتخابية باش ما يتفرشش كيبدا بكري و كيسبق للناس . زاڭـورة فعلا متبع نفس سياسة صحابو غير هو كيضيف عليها لمسات ديالو و كيخدم فيها عقلو مزيان و عندي ليكم مثال حتى واحد ما عارفو و غادي يقتلكم بالضحك و يجعلكم تعرفو أنني ما قلت عليه أخطر المفسدين حتى عرفت علاش قلتها : المرشحين ملي كتقرب الانتخابات كيبداو يعرضو على الجيران و السماسرية و يديرو المآدب و الزرود و لقصاير و هاذي مسألة مفروشة و كلشي عاق بيها ، زاڭـورة لا ... ما كيديرش هاكاك عارف راسو خصو يضرب بنادم ماشي غير لدماغو و لكن حتى لكرشو و لكن كيديرها بطريقتو ، في الانتخابات لي فاتت مثلا شد حقو ديال لفلوس من عند جبران واش دار عوض ما يدير زردة أو قصارة خلى حتى لنهار قبل الانتخابات يلا كان عقلي ينفعني نهار 24 في نونبر و كان نهار الخميس و رسل الأخت ديالو محجوبة و هي عزيزة عليه هي عينيه و حتى حنا عزيزة علينا ، رسلها لعند الجيران تعرض على لعيالات حڭـا ما حڭـا زاڭـورة مختن ولدو ، و إينا ولد ؟ ولد غير مربيه و منعرف منين جابو ؟ واش والدو مع شي وحدة واش خادو باش يكوفري على شي حد ؟ الله أعلم ... و المصيبة لي كتضحك و كتبكي هي أن الدري فايت ليه مختن شحال هاذي و مع ذلك لبسو الضراعية و دار ليه الدوا لحمر و دربو آش يدير و مريضنا ما عندو باس ، و دار عشا فاعل تارك و علم الله آش من هضرة دارت ذيك الليلة ؟ و لكن نخليكم تتصورو آش تقال و تخبلو معايا زاڭـورة مدور بيه عشرات لعيالات في دارو و مقصر معاهم (هارون الرشيد صافي) و نتوما عارفين فم زاڭـورة و النكث ديالو و البسالة لي مشهور بيها و الزعامة نتاعو ، الحاصول ما بقاو رجال في الڭارة و خلاص ... يوا شفتو الدهاء ديال السيد مكيجيش ڭـود بل كيراوغ و كيمركي و هو أورجو و لاربيط لي غادي يلغي البيت كيشريه قبل.
و على ذكر الانتخابات زاڭورة عندو بحال باقي الأعضاء السماسرية نتاعو و لكن أخطر واحد أو بالأحرى وحدة فيهم هي المسماة خديجة البيضاوية و تبارك الله غير من السمية باين العربون : لفعة مفسدة و خطيرة ، سوسة من سوسات الڭارة و من طفيلياتها و هي كتموت على زاڭورة ، إينا نوع في الموتان ؟ الله أعلم ، المهم كتخدم معاه من نيتها و بالجهد و واخا دارو عليها الرقابة في الانتخابات الفايتة استاطعت أن تخلق المفاجأة ، لن نتكلم عن فضائح هاذ خيتنا لأن ذلك يهمها هي و لا يهمنا في شيئ و اللوم على المسؤولين الذين يشغّلون أمثالها و يدخلونهن لبيوت عباد الله و يجعلوا منهن وجوها معروفة.
الهدف ديال زاڭورة من الانتخابات و الانتماء بأي ثمن للمجالس البلدية ماشي هو الشفرة ، إنه أذكى من أن يقوم بذلك على عينك يا بن عدي المخزني الله يذكرو بخير ، الهدف ديالو الأساسي هو استغلال النفوذ الذي يخوله له مقعده الجماعي في إنجاح صفقاته العقارية و مشاريعه المشبوهة : فهو يشتري كل ما لا يجرؤ أحد على شراءه من بقع عليها نزاعات و منازل فيها مشاكل و أسطح ممنوع البناء فيها و ما إلى ذلك ، فهو يشتريها بأثمنة بخسة حيث مخلوضة ولا يستطيع أحد الاستفادة منها و كيقاد ليها لوريقات و كيبنيها و يبيعها بالثمن ، و زاڭورة يركز في همزاته هاته على الدواوير المهمشة و على رأسها دوار بلال لي دار فيه غزاوا و كذا دوار الكلب والبلوك و غيرها من أحياء ، و أستطيع أن أقول أن السيد هو بطل البناء العشوائي في الڭارة من أدناها إلى أقصاها و عنده الميدالية الذهبية في خرق القوانين في المنطقة برمتها ، أضف إلى ذلك تقسيم المنازل التي يقتنيها بطرق ملتوية إلى شقق (بل قفوزا ماشي شقق) و بيعها لذوي الدخل الضعيف بأثمنة مهمة بل لقد تعدى ذلك إلى شراء أسطح كاملة بالبلوك كنموذج و بناء شقق لا تراعي أيا من الشروط القانونية فلا تصاميم و لا رخص بناء و لا ربط قانوني بالماء و الكهرباء و الواد الحار و كل ذلك في ظل تجاهل تام للسلطات المحلية التي لا تنتفض إلا ضد الضعفاء و لا تتذكر القانون إلا مع البسطاء ... أما هدفه الثاني من العضوية فهو الحصول على حقه من أموال الحملات الانتخابية من عند البرلمانيين او المتنافسين على رئاسة المجلس و الحصول على معارف تنفعه في الأيام السوداء سواد وجهه و سواد اليوم الذي أصبح فيه أمثاله يسيرون البلد.
سمحوا ليا اليوم ما ضحكتكمش و ذلك كان مقصودا فما جاء في هذه الحلقة ما معاهش الضحك واخا جاتني الضحكة دابا ملي تذكرت نهار زيدو زاڭورة يجفف في الباشوية في أيام القايد عزالكريم حتى ولاو يشدو فيه الموظفين كيقولو ليه : "الشعيبية راكي تجفي" ، شهر وهو يجفف على قلبو حتى تدخل مكرم عاد تعفى عليه من التجفاف .
و في انتظار أن نحصل على المزيد المزيد من الفضائح نعتبر هذه الحلقة هي الأخيرة في موضوع هاذ الكحلوش لكن لن نفاجأ إن برمجنا لاحقا موسما جديدا لهذه السلسلة المشوقة... ومع أن زاكورة كيولي بحال بلارج ملي كيلبس الجلابية و عويناتو مبرققين كنهديو ليه المثل الشعبي لي واقيلا تقال عليه و لي كيقول :

الله يعطيه ما تعطا لبلارج العين مبرققة والرجلين في المارج

با حديدان كيعجبني اسلوبك او نقدك الساخر خويا بغيت نتعلم منك ديباجة او خصوصا منين كطيح على لخبيرات باش يوليو يقلبو عليحتا انا بحالك نيت باغي نموت شهيد او نكون عندي قضية عايش عليها ها العار الاما فتح شي مدرسة خصوصية نتعلمو عندك ابجديات النقد الساخر راني تاني عندي مؤهلات غير خازنها للوقت. وا با حديدان حديدان وليتي بحال موطور ديال كوكل لي بغا تاريخ ديال شي مفسد يكتب غير حديدان او يلقا المعني بالامر داخل عندك لائحة اخطر المفسدين اجي بعدا بالمناسبة ديال المفسدين كدير لفرزييات ابا حديدان علاش مكتكتبش على ناس زوينين تاهوما خاصهم يتم التشهير بيهم هههههه وراه غير كنضك لكن فعلا دير لك شي دورة عند مربي اجيال و مدراء الابناك او قطاعات خرين بحال الصحة او السيحة اه نسيت تا اشمن سياحة عندنا ولكن الا مخنتنيش الداكرة راها كانت عندنا سياحة من نوع خاص او مازالت على ما اعتقد و تهلا ابا حديدان

بسم الله الرحمان الرحيم
سيرد الله كيدهم الى نحورهم و سيرينا فيهم يوما أسودا و سينصرنا عليهم بإذنه.

شكرا لك أخي حديدان حفظك الله ورعاك من كل سوء وبلية
أبقاك الله حرا لفضح الكلاب الضارية والوجوه المصبوغة على خشبة الواقع المرير الذي تعيشه مدينة الكارة

وا حديدان تكيس شوية راه تاهو ولد لبلاكة 40 او راحنا لي طلعناه باش يخدمنا راه هداك هو عرفو او لي كيقول ليه عقلو او منطلبوش من سيد كثر من طاقتو غير كملو صبركم حيت مازل غادي يرجع ليكم للمجلس البلدي او اراو ما تكتبوا حيث هو مادة صحافية دسمة بامتياز فحرام نحرموكم من هاد البريكول الصحافي غير وجدو الانامل الدهبية لان السيد ممفاكش مع البزيزلة ديال المجلس البلدي أبى من أبى و كره من كره فنا بعدا كنت من شباب لي زكاه في ولاية سابقة لي منجحش فيها و حلف باش كيحلفو الرجال حتى يخوي الدرب او مع دلك يرجع للانتخابات اللي مرات او ينجح انتقاما لهزيمته السابقة راه سيد عندو سبع رواح صافي

تبارك الله عليك أخويا حديدان راني موجد ليك واحد الملف زوين خانز ومعطعط على شخصية بارزة في المجلس البلدي باش تقادها على شاكلة الفكرون بالكرون وتحية مجددة