الڭـارة عقلي و عينيّا ... بقلم عايشة نوازان - روما

فين أنا و فين نتيا
فين دار الضو ، جرانا و العيدية
فين المارشي و ذيك الدار
فين بوفينوس و الحسين النجّار
فين زغيبات الفار
و درهم سمن حار
فين بوعزة و خالي بوشعيب العطار
فين الفلّاحا والناس لكبار
فين ولد زهرة كينانة ، الشتوكي والحاج محمد ولد بڭار
فين مول الطاقية لملقب بدوا الفار
فين فاطمة زروال ، سي الجابري و سي مسكار
فين سي الحسين لي يقطّع للكار
فين أنا و فين نتيا
فين الحوس و ابراهيم الشفناج
فين مولاي لحسن و ولد سي عيسى مول الدجاج
فين الشيخ عمر ، الشيخ لحسن ، الشيخ فرّوك و الشيخ حجّاج
فين ولد الوعدودي المعطي و مصطفى ولد الحاج بلحاج
فين أنا و فين نتيا
فين غافال ، الكاميو و التبن
فين ولد لڭعيصة مول اللبن
فين ولد موسى لي يبيع الكفن
فين فايدة ، لالة كنزة ، خال الطاهر و محمد الجن
فين اللّبى ، لحليب و الفرارا
فين خال الياماني و عايشة الڭزارة
فين البولانجي و ريحة الكومير
فين الخطبة و الحاج البشير
فين الوجدي سيد الجيلالي و الفقير
فين زاڭورة ملبس الشورطات للحمير
فين مولات الملف و الحرير
فين زينة لكريب و البغرير
فين الحاجة عايشة مرت الحاج الصغير
ربي حبها بغاها عطاها العقل و الفهامة
أصلها من فاس بلاد العولاما
فين أنا و فين نتيا
فين دار الحمزاوي و دوار المخازنية
فين حادة ختي زينة السمية
فين لي كبرات طارق ، زريدڭ و غانية
فين البودي ، برّي ، موحى و الڭلوية
ما بقيت فيه لا أنا ولا نتيا
مشى زينڭا بقى فيه احمد ولد السطاتية
شحال تقطع علينا الما و الخميرة حتى هيّ
فين الڭديدة و المرا الفحلة
فين خالتي يامنة و زينب الفحلة
فين أنا و فين نتيا
فين بنت الهول و الشيخة دامية
فين حادة مرت البولانجي و حادة الدرنونية
فين فاطمة لي تبيع الدجاجة و البيبية
فين بوعزة ولد الكيحل و عبدالسلام راجل الڭدانية
فين صوتو و زيدو صوتو على الكاكية
فين الرّاي راجل الورقة و الحسبية
فين سي الويهراني ، السيمكة فين تبان الحولية
فين العلوي مسير الخيرية
فين أنا و فين نتيا
فين ولد نجمة ، الجغل ولد البوعزاوي
فين بلّا ، ادريس ، نورالدين ، سيف الدين و المكاوي
فين الشرادي و التدلاوي
فين رستم و العربي ولد العلوي
فين محمد الواعر الملقب بالبيضاوي
فين الشفنج مع الفطور
فين بوبڭرة نفار مع السحور
فين الكوايرية حجو ، محامح ، و العربي ولد زهور
فين العيد وجّدو الشواية و والماس
فين لانطير معلق فيه الكسكاس
فين الزوهرة لاستيك و الزوهرة بنت حار الكاس
فين سي بلحرشة وشاري راس
فين الڭلسة ، الحاج صالح و خالي عبّاس
فين أنا و فين نتيا
فين موحام الجيلالي و الحاج ادريس
كلنا نفكرو في الديور و جميع الفليس
الڭارة ما طوّط فيها تران والا حبس فيها طوبيس
التوريس لي جا يقول ليك هذوك البيبيات سمانات
نديرو عليهم شي تكسكيسة ولا رفيسات
بسم الله عليك أحنيني راهم غير ميكات كحلات
قتلونا بشجر الدفلة ، الطويوطا و الطاكسيات
قوّاو علينا قاوت البنكات
ناري ناري لمسن الحرشة و التيليبوتيكات
معامن باغين ندويو لا وزينات لا شاريكات
خصك بوط باش تدخل للخميس تشري جوج باطاطات
حيدو علينا لكراول و رفقو بالحيوانات
هالعار ديرو لينا طوبيس ولا جوج طوبيسات
أميمتي تدخل للڭارة ما يبقى عندك لا كيلاس والا بنوات
حنا ولاد السبعينات و الستينات
ما كنّا نعرفو لا ماحية لا سيليسيون والا جوانات
حقنا في جريدات نايض فيهم الڭازو و جوج وريدات
جردتنا فيها الزلايڭة مهرسة و عمر يبيع لاباني و بولووات
بغينا لابيسين نعاومو فيه لوليدات
و سبيطار فيه السيروم و جوج ناموسيات
والله وما عندك لاميتيال يردّك ولد قدور ميت من الزبيرات
ما تبرعنا بحال ولاد برشيد ولا ولاد سطات
ڭارة سيد العربي ، أدخل لسيت الڭارةويب
البوشرو عندها تاريخ على برشيد و بن احمد لقريب
فين أنا و فين نتيا
فين عايشة مت بويدرة ، حدوم و شامة المعزية
فين خال لميلودي ، خالتي فاطمة و هنية
فين ولد القلقولي ، موحام لكبير ، فانة و الخبوطية
فين الحاجة فريحة ، زروالة و الولدية
فين عايشة قوعّ لي حكّت ليك و صبنت ليا
فين لي فضلت الرحلة على الحياة الزوجية
أحييّانا شحال عانات لكبيرة المحمدية
فين أنا و فين نتيا
فين شبابنا لي باقي يليق
فين فتيحة بن ريان ـ ثورية و جميلة صديق
فين عبدالرحمان بوريش ، مصطفى الفردوسي و أحمد رفيق
فين الطبسيل فيه التوني و عاونو الفريق
فين سي علي لعدول و ولد صايلة لي يكتب الحقوق
فين الجيلالي المخزني ، فضّول و و الكولونيل فاروق
يا ربي نعيشو قد ما عاش عبروق
فين أنا و فين نتيا
فين المختار بات جمال و أصيف
فين العرفاوي و عبدالقادر بات نصيف
فين حزّيكو و الحاج التاقي
فين طاحونة مول الطالع ، خابّة و طاحونة السحاقي
نوصيك تبرّع ما تخليش الدجاجة تقاقي
عنداك يجيك ولد منّانة و يجمع ليك الباقي
فين أنا و فين نتيا
فين المرجاني ، الحاج الراوي وولد لفنون
فين لوطيل ، البوشرو و السبيطار لمسكون
فين أورانجينا ، سيم ، أبلا ، كروش و لاسيڭون
فين قاديمي مولاي علي عبّاد و القايد المامون
فين الضريبة ديال الوذن مخرجّها القانون
فين أنا و فين نتيا
فين حار الجرية ... عجباتك الطاڭية
فين بطوطة ، بوب مارلي ، و حميّة
فين فورصي ، السي فاتح و الربعية
فين الكوري ديال الدقيق مقابلها محجوبة السطاتية
كيقولو شحال من روح قتلات بنت المليلية
فين المنصة و السهرات فلعشية
فين البولات شاعلين ، مزّينها ساحة الحرية
فين فطومة مرت الشرّادي و الكؤوس الذهبية
فين سي محمد الفرملي و مباركة الزروقية
فين أنا و فين نتيا
فين السعداني و رحال قنّي
فين لحمام تاع الصيني
فين حيدوزة ، البيض و بيبي
فين الحاج الحسن و الحاج محمد ولد الطيبي
فين الفيرمة وبلّارج
مشات الرجال بقى غير البيض المارج
فين رنب و سطايلة
فين الموطور و الحاجة الصايلة
فين بيزانا ، القمح ، الشعير و الصلاح
فين الزروقي ، لحروني ، هنينّو و الرباح
فين دويدة و كار ولد بلفلّاح
فين بوعزة النسر ولد ادريس البرّاح
فين السي فاتح ، السي الحوباري ، مجد و السي إصلاح
فين الصبورة في سكينة معلقين فيها أرقام النجاح
فين السمعلي حانوتو عامر دلّاع و تفّاح
فين أنا و فين نتيا
فين السي الداودي ، لحسن هرّو و كاع هرّوات
فين الڭرش و بنات بوزيد بجوجات
ما تهمّك لا مرسيديس ولا كات كات
فين الحاجّات جوج مليكات
فين لي كبّرت ليتامى ولاد و بنات
فين لي علمت لكروشي و لقضبان للعيالات
فين جمّي سعيد ، طومة و صالح ولد لحمودات
فين عسكرنا صدورهم عامرة ميداليات
فين ولد شرّادة ، كردود ، البهلول و قايدهم الحاج الطرفاوي بالذات
فين خوديجة بنت كرّوم وحدة من الجابريات
فين الشّاريّو عامر بالحشّاشات
فين العنب لكحل جاينا من ليندات
فين بنت البرادعي لحلاوة زينة الشطحة و الدرديكات
فين العڭلة موسمنا تاع الزبيرات
الخيل تلعب ، لحوالا مشوية و الشيخات الخنيفريات
فين حيمّة لي يفرق لبراوات
فين أول ميكانيك السيارات
فين بوشعيب المرواني ، ولد الجمل ، الشعباوي و بوعزة ولد حمودات
أحييّانا مشى حتى لامين ديال الطاكسيات
فين الطيبي في الحايط يخرج المات
فين ماريّة مشات ما ولّات
ما بقاوش يدورو صحاب لّواني و المانطات
وا سي حمامة فين الرسم و اللافيتات
فين أنا و فين نتيا
فين نادي لغزال ، الصويك ڭرونة و فتيحة الشينوية
فين شعر قوتي و عينين حدّوم الجزايرية
فين الحاج التومي و العسكري راجل حمّادية
فين عبدالسلام ولد الضاوية و البصري مول العطرية
فين ولد نحيلة و ركّاب مولاي بوعزّة
فين الخبّاز في شطيبة يبيع الخبزة
فين أنا و فين نتيا
فين البيّار و الفليبير
فين قهوة بلاكي و قهوة خنّير
فين الحمّام وقايدي الحاج الصغير
فين سيدالجيلالي الوجدي ، بن علي و الفقير
فين طونوبيلة مسيكة و طونوبيلة العوفير
كلنا كلنا الطون و الحرور فلكومير
فين عبدالله ولد المودّن و عبقادر السفير
فين الصالا و الدين و الشاعير
شحال من واحد كان مشوڭ في الزبدة و الكوفيتير
فين أنا و فين نتيا
فين زطّو ، شرف و بطّاش
فين عطّوش بنت العربي مت فدواش
فين المعطي ، حمين التّامي و الناصيري عيّاش
فين أنا و فين نتيا
فين يوسف الجابون و العقلية
مرحبا بشوميشة جابت لينا القناة المغربية
تصبتي بعيدة عليا كون جبت ليك شحيما الغيّاط و الدقايقية
أويلي طيبنا ليها البطبوط و قنية
فين الحولي مشوي في الفرّان و محطوط في الصّينية
فين رفيسة بيبي و السمن مصاوباه بيديا
فين أغنية باطاطا مقلية
فين الحاج لحبيب الساخي و الباقيّة
فين بيّاضي الإيردوز و الجلّابة بزيويّة
فين أحمد موجيب و زهرة الفرملية
فين القابلة زهرة و ماما البرشودية
فين الشويرفية أمّي حادّة القرشية
فين لمقصّ ، زروالة و الرحّالية
فين أنا و فين نتيا
فين سطاسيون حمّو أجيب
فين بّا لحسن آيت لحبيب
فين سي بن زينة منوّر بن لخطيب
فين الميلودي عمر و العيساوي بن الطبيب
فين لي صنع لمكاحل و الريال في ولاد بلخطيب
فين أنا و فين نتيا
فين الدنيا و فين المال
فين الحاج التاغي و تراكتور حمّو بن علّال
فين الوطنيين ولاد لحلال
فين لحمر بن منصور ، الشيخ ادريس ، آمحمّد ولد نعناعة و بن زروال
فين حفّار لقبور خالي رحّال
فين السي ابراهيم و الفقيه العاسال
مشات الكوباراتيف مع صالح و علّال
فين سي حبيب الله و خال لمشرافي في حليمة السعدية
فين أمي الزوهرة ، لالة فاطمة ولالة هنية
فين أمي فاطمة جمّي و التفتيشية
فين صالح ولد لحمر و أمي دامية
فين الميلودي ولد منصر و نادية بنت لعبيدية
فين الشفيفيڭ و المرواني راجل الشعيبية
فين حسن بوطيب واحد من لحرايفية
فين السوق لقديم و الحاجة زهرة الذهيبية
فين البومة ديال الحاج صالح ولد الفرجية
فين الدوار ، الشيبة ، ولد رابحة ، ولد السعدية
فين أنا و فين نتيا
فين لحوايج لغد لعيد
فين نسيب لبليدي ، الصاغير و سعيد
فين المرحوم الحاج عبدالسلام بوزيد
فين النفاخات ، لكرارس ديال الزريعة و الفنيد
فين الحاج محمد شرّوق و الحاج بلعيد
فين البڭـرة ذابحها خالي آمحمد و مفصّلها لعبيد
عادتنا الكسكسو بالمجبنة ، الكرداس و الڭديد
مرحبا بالجالية المغربية عند الباشا الجديد
فين أنا و فين نتيا
فين الحاج النعانعي ، الخرّاڭـا مت الشافعي و السعدية
فين واد بوعسيلة ، لابيسين و الغروب
فين فرّان البولانجي و فرّان عرّوب
فين الكوباراتيف ، الخيش عامر حبوب
فين أنا و فين نتيا
فين ولد العلوة ، العربي الصرّة و لاطيار الشعيبية
فين الدريويشات بجوج
فين الشليحة و مينة لڭرّوج
فين بنت الصافي الحاجة خدّوج
فين لهلال مع الصبحية
فين لعيّاشي و سي الرّاجي راجل الداودية
فين عمر اللوطة و كار الحاج لمعطي ولد الفرجية
فين بنت نعناعة ، بوعزة و وشام الغابيّة
فين ولد بديدي ، البوعا و الزبيرية
فين أستاذنا مول العربية
فين محبّ البلاغة و القافية
مشى علينا خوك ألعايدية
فين الحاجة مريم مت بدر و مديحة حتى هي
فين مرت الكبّوري الحاجّة السعدية
فين عبدالإلاه العربي المحمدي و الحاجة الفكّاكية
فين أنا و فين نتيا
فين لي غرس شجر الليمون قدّام البيبان
مزّينها الكارة ما بين شكيب و جعيدان
الكارة عطاتنا الصحفي ، المدير ، الطبيب و الفنّان
و البوشرو لغزالة غنّى فيك عمر السيّد واحد من الغيوان
فين زازية و الطويهر عازف الكمان
فين حانوت خريبش و حانوت ولد قرصان
فين ولد لحلفية ، نعيمة حجّي و بابا خشّان
فين حيا روما وسقط روما جوج إخوان
طرابشهم حمرا بحال بلعمان
فين ولد خابّة ، العدناني و بوزيّان
فين الحاج لبزيوي أحمد و أرسلان
فين ولد سي لمعطي و بلعالية الطرجمان
فين عاود قابيلا مدير ولاد زيّان
فين سي فاريح ، موستاري ، جعفري و سي سعيدان
فين لكبّوري طارق و خالد سوسان
فين سي عبدالصمد ، السوسي و صفوان
فين موسم سيدي عمر القدميري مفرشخ فيه الرمّان
فين ثلاثات لبنيّات كيلعبو كاري قدّام لفرّان
فين فردوسي خديجة ، الحنفي سليمة و عايشة نوازان
الڭـارة ماتبان قدّامك لا روما ، لا ستراسبورغ والا ميريكان
محّرّها موتة الرجال في الطاليان
فين لصفر لغزواني و الحاج ولد سي حسن
فين بنداود ، حمين و بريّان
فين الناس لي خدمو نتجو و عطاو للبلاد
فين بالدي ، كورنيس ، ولد لابورت و بوشعيب لحدّاد
و الله ما نساك ألڭـارة لحبيبة
فين جرّار ، العالمي و احمد رتيبة
فين رحمة بنت الڭرّاب و النصرانية الطبيبة
فين المنجج و جاري الخيط
فين التاجاني و السينيما فلحايط
محلاه زيتون باڭـورة
و صوصيصّو زاڭـورة
و الله يرحم الناصيري محبّ القميص و الكورة
فين أنا و فين نتيا
ما بقى لا قفطان ولا فوقية
ولّا يخيّطهم الجبلي و الجبلية
شي تزوجات برومي و شي تزوج برومية
شي مشى لبلاد الروم و شي مشى للمحمدية
الڭـارة نفديك بعقلي و نزيدك عينيّا
بغيت نرجع نلعب فيك ولو غير شوية
نتذكر ذكريات الطفولة كاري ، لاستيك و الطرنبيّة

الڭـارة عقلي و عينيّا

عائشة نوازان - روما

فين نتي وفين هي ؟ والله- من خلال هذه القصيدة- الكارة بجانبك أنت سافرت وحملتيها معك برافو برافو *وما أجمل أن تكون الغائب الحاضر على أن تكون الحاضر الغائب*

فكرتني في بويا يرحم بوك

فين كارة تبعني وزيد تبعني ويا ترى نعطيك وقت من الأوقات
شحال من وحدة غيزهها خوها ومن الدار ما بقات خرجات
ميمتي على أيام عطيني غير لفلوس وخا يعرف خوية او ختي تسخرات
فين بعد من ختي ولا نهرس ليك هادوك السنينات
أو سير يا وليدي ما عندنا ما نديرو بالشوهات
الى بغيتي بنتي دير لحلال أو جيب لعدولات
هادي أيام الأب ساكت والأم والله إلى تكلمات
فين قال الله أو قال الرسول يالميمات
ولا غير خلي بنتي دير لي بغات
عاما يبانوش عليها الخرينات
اويلي على زمان لولاد بالطانقة والشعور مقبوطات
بنات ١٣ سنة العكر في الصاك، الطالون والصدور عريانات
حشوما قلدنا الغرب في التفاهات
وخلينا حاجاتهم الزوينات
كون رجعت جدة كون ندبات لحنيكات
وجدي حتى هو ضرب بالقرطاس والزرواطات
أيها السادة أيها السادات
راني ماكنعممش بنات الأصل باقات
غير هما قلالات
أوما علينا غير ندعو للجميع بالهدايا والثبات
إو سمحوا ليا نوض نشوف لوليدات
إلى يديروها بيا ويقولوا حكا كنت مقابلة منتديات
....في ٢٠/٠٩/٢٠١٢