يا ويل حديدان يلا طاح في يد العديان

من منكم يهوى مشاهدة أفلام الكووبوي يعرف بلا شك جملة "وونتد" بالإنجليزية و هي "روشيرشي" بالفرنسية و "مبحوث عنه" بالعربية و من يداوم على هذا النوع السينمائي الذي أعشقه يعرف أنه في بعض الحالات توضع مبالغ مالية على رؤوس أعتى المجرمين بل و قد تنضاف جملة "وونتد ديد أور لايف" مما يعني "روشيرشي مور أو فيف" أي "مبحوث عنه حيا أو ميتا" مما خلق نوعا جديدا من الباحثين عن المجرمين يدعون بقناصي الرؤوس ... وهذا ما يحدث منذ شهور لأخيكم حديدان فلقد أصبح مبحوثا عنه و أصبح لرأسه ثمن و لقد اشتد عليه الخناق بعد انتهاء الانتخابات التشريعية التي ساهم فيها بإسقاط بعض ديناصورات السياسة و بعض سماسرتها و ربما ستضيق به الدنيا مع اقتراب موعد الانتخابات الجماعية و ليس بعيدا غدا أن يتهم بإسقاط مرشحين و تمهيد الطريق لآخرين فتصبح المصيبة مصيبتين فيعطى لحديدان وزن أكبر من وزنه و تلفق له تهم أكبر من قدره فيتكالب عليه المتكالبون و يخرج لنا في الكارة نوع من صيادي رؤوس الخلق المأجورين ، بل لقد بدأ أناس من هذا النوع في البحث عن حقيقة حديدان طمعا في الحصول على المكافأة الموضوعة على رأسه حيا أو مفرشخا فتراهم يجوبون مقاهي الأنترنت سائلين روادها و تراهم عاصرين أمام بيسياتهم متحفزين للانقضاض على أول خيط قد يقودهم إلى حقيقة حديدان و تراهم باحثين بين مرتادي المواقع الاجتماعية و أعضاء منتدى صوت الكارة و خصوصا منهم قدماء منتدى الكارة ضحية أبناءها.
فلا تستغربوا إن رأيتم مستقبلا إحدى حلقات برنامج أخطر المجرمين تتعرض لكيفية إلقاء القبض على حديدان الكارة و لا تستغربوا إن كان عنوان الحلقة بوكلمة على وزن بوصمة أو السرّاح الموجريم على وزن السفاح الوسيم أو يلا نجى على وزن نينجا أو كفيتة على وزن زويتة أو طياح السوارت على وزن سفاح تارودانت أو أيضا حديدان و الكلاب على وزن ليلى و الذئاب و هي كلها عناوين لحلقات من ذلك البرنامج أو قد يكملوها و يجملوها ويديرو عنوان طويل عريض هكذا "بوكلمة هذاك السراح الموجريم و الله يلا نجى حتى نردوه كفيتة هذاك طياح السوارت تاع حديدان ولد لكلاب".
و لا تستغربوا إن أعلنوا أنهم ألقوا القبض علي في مغارة من مغارات "تورابورا" عوض في متاهات "ثورة غيرا" فأنا إنما ثرت غيرة على وطني و مدينتي و ناسي و لكننا ابتلينا بقوم يفسدون و يلومون من انتقد فسادهم و إفسادهم بل يرومون معاقبته و الانتقام منه و ممن خلّفوه بل و حتى ممن عاشروه و لربما في حالتي يتمنون أن يقطعوا أوصال كل من قرأ كلمة من كلماتي و أن يفقأوا كل عين رأتني بل أن يجدعوا كل أذن سمعت عني ... هاذي عليكم و طفيو البيسيات و ديروا روسكم ناعسين قبل ما يعيقوا بيكم كتقراو يوا هانا علمتكم ... أما علي أنا فيا ويلي لو أمسكوا بي سيضيع دمي بين الأحزاب و القبائل أنا بعدا خايف غير من هذاك كرنخ لا يدير ليا هذاك الشي لي كتبت عليه ديال كرنخ يكرنخ تكرنيخا أي فرشخ يفرشخ تفرشيخا حتى يصبح نصف وجهي دلاعا و نصفه بطيخا.
أما شي خماميس عند بوزيانات و علالات غير الله يحضر السلامة كاين فيهم لي نايضة ليه بالة في بلاصة يدو و كاين لي مكيحتاجش للمذرة كيذري التبن بصباعو هذوك يلا حرشوهم عليا غادين تلقاو الجثة ديالي مذرية حبة حبة و قشة قشة.
ولد عايشة خلاص هذيك المرة صيفط ولدو للحبس في بلاصتو هاذ المرة غادي يقول ليه غير سير أولدي تجلس أنا لي غادي نتكلف بهاذ المهمة ، هذاك راه كون دخلت للحبس يعترف ليهم بأنه هو لي كان يبزنز ماشي ولدو باش يعتقلوه و يدخل للحبس غير باش ياكلني و ماشي هذيك ياكلني ديال المجاز راه ياكلني ديال بصح يعني يمزقني و يجبد ليا الكبدة ديالي وياكلها خضرة.
و مننساوش مول لبراوات ولد الولدية هذاك غادي يشري كاع براوات الفارماصيانات ديال الكارة و يغرسهم في كل سنتمتر من جسدي ، بلحق أنا لي جبدتو و قلت عليه كيدق لبراوات وانا دابا قبل ما يشدني ضروني مصاصطي حيث بدون شك غادي يبدا بيهم هوما لولين مع أنا مكنحشمش و جبدت ليه مصاصطو ... حتى أنا بعدا مرات كنعيق نيت ياك ؟ واراها الغيرة بنت لكلاب لي مدايرة ليا هاذ الشي كامل الله يعطي لبوها شي غبارة.
خونا في الله صلحان يلا شدني حتى هو غادي ما يبقاش صلحان غادي يولي ضربان ضربة ليا و ضربة لليهودية ديال يدي ... آشمن ضربان ؟ على هذا دق الضرب ؟ راه يتسوف كركدان و يولي ينطح يمنة و يسرة و يكون شبعان بيرة و خمرة و كل وحدة ضارب منها عشرة و تعالاو تشوفو التمرميد في الغبرة و الركيل خطرة خطرة و الرجيم حجرة حجرة غير سكتو و صافي ما تفكرونيش.
أنا ربما لي غادي ما يآذينيش بزاف هو مكرم هذاك راه خونا و يحن يحن ياك ؟ ولا كنحلم ؟ و المصيبة أنه زكريري يعني عندو مع الحجر و العيسرية ، و لكن يلا كنت مرضي هي نبقى غير مني ليه حيث يلا دخل الزكارنة في القضية خوكم ما فيهاش يمشي فيها مشيا مبينا و مشية بدون رجعة و بلا ما نتصور آش غادين يديروه فيا بنو زكرير.
السي نورالدين ولد مليكة هو لي واقيلا يقدر يميك عليا و عندي باش نشدو مع نقطة الضعف ديالو هي البنات غادي نوريه كيفاش يشاتي و كيفاش ينافيكي و نصايب ليه على وعدي و سعدي كونت في الإيميسن و السكايب و الفيسبوك و نبارطاجي معاه لي كونطاكت ديالي و يا دار حديدان ما دخلك شر، ولكن ياويلي يلا بلز دوك لعوينات و كشكش عليا و ما قنعوه بنات خصوصا و أنه رياضي غادي يتسوف ليا جاكي شان و يخرج فيا نيشان و يبدا بالضرب قبل السبان.
و واحد مول جوج كروش السي آيت حمادوش غادي يريب ليا الدار ، يقول ليا بني عشوائي و لكن ما غاديش يعلمني غادي يريبها ليا فوق راسي ، و محالش واش يبرد غدايدو و ربما يمشي يريب دار الوالد و ديور كل من يحمل إسمي العائلي واخا لي ماشي من عائلتي و سخط عليهم الله و طاحو في كنيتي.
هرو رشيد هذاك نغلبو متخافوش عليا مع هو قصير عليا ننفخو عصى و لكن الإيركات ديالي مشات فيها يدير ليا مازوط عوض ليصانص ويلا غفلني خوكم يولي هو البوعزيزي ديال الكارة و مع هو ليصانص ديالو و عندو بالشايط غادي يغطسني في برميل ديال ميتين إيطرو عاد يزند لوقيدة و مرة مرة يرشني بخمسة إيطرو ديال الفابور مع أنا كليان ديالو و ما راعيتش للمازوط لي مشاركين.
شكون نسيت وايلي وايلي علاه أنا خليت شي واحد و حتى الجدارمية لي يقدرو يحميوني كحلتها معاهم ويلا تشديت حسام غادي يقول ليهم باغي نرجع نخدم فابور و السي احمد غادي يجيب معاه ليبول أي الكرات الحديدية لي كيلعب بيهم و منقولش ليكم آش غادي يدير ليا بيهم واخا موحالش يدخلو ويلا دخلو ما يفوتوش جوجات و تخرج الروح مع هوما مدربين على القراعي و الفاهم يفهم خليوني نحشم راني نكمكم.
و لنفرض فلت من هاذو كاملين و وقفات معايا رضات الوالدين و تخزنت في شي قيهرة كحلة المقدمين يوليو يخدمو الليل و النهار و يزيدو السوايع و يبقاو حتى يجبدوني و ياويل من داروه المقدمين بين عينيهم ، أودي راني مشيت فيها ، غادي نولي شبح وخلاص حيث حتى وثيقة ما بقيت نحلم بيها ، و شكون هذا لي غادي نبقى زعمة فيه و يسني ليا ؟ غادي نتوحش السنية ديال المقدمين و نولي نحلم بيها و نهتهت و غادي نولي مواطن غير موجود لا في اللوائح الانتخابية حيث ضروري ملي غادين يعرفوني غادين يشطبوا عليا و لا حتى في الكناش ديال الحالة المدنية الكناش غادي يرجع تفتاش و الحالة المدنية غادة تتحول حالة مزرية .
ربما الباشا مع كيتاقى الله يقدر يحد الباس و انا زعمة مقصحتش معاه و خليتو لدواير الزمان فلربما يوقف معايا هو الإنسان الطيب ، طيب ؟ أوالله غير يلا ما طيبني حتى هو ، غادي يدير ليا واقيلا حضر الإمضاء و يقول ليا ياك جبدتيني أنا و المقدمين ديالي يوا حتى أنا مضامن اليوم معاهم و والله السنية يلا بقيتي حلمتي بيها و أجي بعدا عندك الرخصة ؟ آسي الباشا راني غير كاري آشمن رخصة ؟ الرخصة باش كنتي كتكتب ، و نوليو في المنتدى خصو محضر مخالفة بناء و نوليو في هدم المواضيع ديالو و تنوض إدارة المنتدى تدير بيان للسلطة و الرأي العام و تتبرأ مني و ينكروني خوتي المناضلين و يكمشو فيا أخواتي المناضلات لي غير البارح كانو عليا مزغرتات.
الحاصول سيهدر دمي و سيضيع ثأري بين القبائل و عرفتو هاذ سيضيع دمي بين القبائل منين جبتها من قصة الرسول (ص) لما نصح أحد القرشيين أعداء الإسلام باختيار شاب من كل قبيلة و يسلمونه سيفا على أن يجتمعوا على سيدنا محمد و يضربونه بسيوفهم ضربة رجل واحد و هكذا لا تجد قبيلة عبدالمطلب أي عائلة الرسول علامن تلوح اللومة و ما يلقاو فيمن يشدو فيضيع دم الرسول بين قبائل العرب ، يوا واقيلا هاذ الشي لي غادي يديرو ليا هاذ خياتنا حيث يلا طاحت البقرة كيكثرو جناويها و كنظن أنهم غادين يتحاماو واخا أنا كنت محاميهم غير بوحدي و ما غادي نعرف ليد الفوقانية من ليد التحتانية ملي غادي يكلخوني عصى "أح لحمي كيوجعني" ، عقلتو على واحد الإشهار قديم كانو كيقولو فيه : "أي لحم سناني كيوجعني" و كيجاوب واحد كيقول "عليك بطونيجونسيل" عقلتو عليه ؟ ، أنا يلا قلت ليهم "أح لحم كتافي كيوجعني" غادي يجوبوني "حنا علينا حتى الدم يسيل" أو "ما عليك غير بالدمع يسيل" أو "سكت يا وجه الويل" ، قاليك "طونيجونسيل" إيواه...
ومدام جبدنا الرسول عليه صلوات الله و سلامه تذكرت قولته الشهيرة "والله لو وضعوا الشمس في يميني و القمر في شمالي على أن أترك هذا الأمر ما تركته" ، يوا حتى أنا قدوة بسيد الخلق و مثالنا الأسمى في النضال من أجل إعلاء الحق و إزهاق الباطل أقول لكل هؤلاء "والله لو وضعتم مليارا في يميني و فيلا و كاتكاتا في شمالي على أن أترك فضحكم ما تركته" و سأضيف "والعالي في خيلكم ركبوه" و أضيف "ويلا قدر لي الله أن أسقط بين أيديكم فسأكون أسعد الناس ، فلأن أوذي في سبيل قول كلمة حق خير من أن يؤذى أبنائي غدا من طرف ورثتكم" و سأضيف "غير بيا ولا بيكم حتى يفعل الله أمرا كان مفعولا" و أضيف "والله ما مفاكين" ...
و في الأخير أوصي هؤلاء الذين يبحثون عني لإذايتي بأن يقتلوني خيرا لهم حيث يلا هدا حتى تكرفصو عليا و بقيت حي ما نعاودش ليكم آش غادي يطرا ، غير يلا شديتوني ديرو خدمتكم مزيان حيث يلا خليتوني نفلت غادي مصارنكم نجبدهم و الفضائح و الوثائق لي كنت مراعي لعائلاتكم و ما باغيش ننشرهم غادي ندير فوطوكوبي و مع غادي هذيك الساعة نولي مكشوف غادي نهبط للشارع و نوزع بالليل و بالنهار و هذيك الساعة ما غاديش نبقى مكتافي بالفضائح السياسية و الإدارية كيف دابا هذيك الساعة غادي نخربها فوق ريوسكم و غادي ندوز للسرعة القصوى و هذيك الساعة يلا تكافيتو غير مع عيالاتكم و ولادكم متعاودوها لحد.