الإصلاح الخبزي

إيوا باراكا علينا. كتّرتو علينا بالهضرة الخاوية والعامرة واللي نصّ نصّ. النهار وما طال كتقولو لينا درنا ليكم، فعلنا ليكم، تركنا ليكم، زعترنا ليكم و لي جايين حتى هوما غادين يقولو غادين نديرو ليكم و نفعلو ليكم و نتركو ليكم.
أسيادنا الله يرحم ليكم الواليدين، الله يجعلها صدقة مقبولة، ولكن خلّيونا حتى حنا ندويو شوية على راسنا، ونقولو شنو ما زال باغيين يتغيّر فحياتنا، أما اللي تغيّر (يلا تغيرات شي حاجة) راه عارفينو و هو وجوه الزفت لي كتناوب علينا.
أبرز عاداتنا السيئة في الكارة هي أننا دوما نقارن أنفسنا بالناس اللي التحت، بالحق غير فالحوايج الخايبين، والحوايج الزوينين كنقولو على راسنا حنا باقيين فالطريق، إيوا شحال خاصنا ديال الوقت باش نوصلو بالسلامة؟
نقول إن مكرم حسن من الفقيهي و أن المحمدي الله يرحمو حسن من صلحان و بوزيان حسن من الرشادي و وحدين خرين كيقولو العكس ، كنقولو ان نسبة الفقر عندنا في الكارة أقل مما هو الحال في الزايير ، ودرجة الحرمان عندنا أقل مما هو الوضع في بوركنافاصو… وقس على ذلك ما شئت… النسبة الوحيدة اللي حنا مأكدين أننا حسن من الدنيا كاملة فيها هي أننا ما كنتقاضاوش من الهضرة… هادي نحنّتو فيها أي واحد.
المجالس تمن علينا بأنها تمنحنا لابيلانص و خزانة البلادية و سدادر قوم عاد و كيمنو علينا ذاك الشي و هو من فلوسنا و ضرائبنا ، واش كاين شي منكر كبر من هادا؟
البرلمانيين ، الله يغفر ليهم، تيجتهدو في ضرب الحسابات وتخلاط الهضرة واحد يقول درت و درت و شيما دارو و واحد يقول ما لقيت معامن نخدم و لاخر ضاربها بسكتة و بسلتة مع العلم أنه حتى واحد ما كيبان غير من خمس سنين لخمس سنين .
داخلنا عليكم بالله واش شي واحد ما لاقيش باش يعمّر البوطا، ولا ما لاقيش باش يمشي للسبيطار، ولا ما لاقيش ما ياكل كاع غادي نجيو نقولو ليه حقّا ما حقّا راه الكارة غادية مزيان و حنا غادين نصلحوها كثر ، وصبر معانا شي 80 عام غادي يكون الخير. لا إله إلا الله.
أعباد الله، راه والله لا طفّرتوه يلا ما ردّيتوش البال للمواطن. أييه، الديمقراطية مزيانة، السياسة لا بد منها، ها الانتخابات جاية سيرو نجحو الله يكمّل بيخير. ديرو الفلوس خمسة وخميس. وبقاو حاضيين العتبة بحال يلا باغيين تسحرو لشي واحد… ما كاين باس، ولكن الخبز راه حتى هو مهم.
على ما يبدو غادين ثاني تلهيونا مع الانتخابات و الحملات و برامج برق ما تقشع و خطابات التشلهيب وشدّ لي نقطع ليك (كاع هادي نفس ضارباكم على الكارة زعما؟)، بقيتو تخبرو لينا على الإصلاح ونسّيتونا فالمهم من هاد الشي كامل: الخبز أعباد الله.
نهار نشبعو ندّاكرو معاكم مرتاااااحين، ونديرو شي دكيكة ديال أتاي كاع، وأراك ديك الساعة للسياسة والحساب.
آش بقا ما يتقال: الله يغفر ليكم وخلاص.

داخلنا عليكم بالله واش كتفهمو آش كيقول ليكم سليعفان؟

محاااااااااال.

يوا تبقاو على خير.

محاااااال واش غادي تلقى من يفهم كلامك يا سليعفان هههههههه.